Il project preschentà a chaschun da la radunanza communala cumpiglia la renovaziun dal bajetg da l'ustaria Posta Veglia e la construcziun d’in nov edifizi sin las parcellas 819 e 1190 en il center dal vitg. La renovaziun dal bajetg existent sa concentrescha surtut sin ils dus plauns sura ed il tetg da la Posta Veglia. En tut en planisadas otg abitaziuns per indigens. La fatschada istorica da la Posta Veglia resta preservada ed il spazi liber restant duai vegnir concepì sco curtin cun pumera. Tenor il messadi è il scopo dal project da rinforzar il center dal vitg e da crear ina structura d’abitar variada.
Per gronda discussiun durant la radunanza communala han betg las abitaziuns, mabain la dumonda co che l'ustaria Posta veglia duai vegnir manada vinavant en l'avegnir. En la proposta da la suprastanza duai quella vegnir fatga pli pitschna e manada en furma da bistro. En ina discussiun ch'è daventada fitg lunga ed emoziunala hai dà votums pro e contra questa varianta. Cun 49 encunter 31 vuschs ha la populaziun decis da cuntinuar cun la planisaziun dal project
Budget equilibrà
Unanim ha la radunanza approvà il budget per l'onn 2025. Quel quinta cun expensas ed entradas da 3,5 milliuns francs. Il pe da taglia resta a Schluein era il proxim onn tar 50% da la taglia chantunala simpla.
Stritgà tractanda davart cunvegna cun chasa da tgira
La suprastanza communala da Schluein è sa decidida da spustar la tractanda da la cunvegna da prestaziun cun ina chasa da tgira. Raschun per quella decisiun è ina brev dal Departament da giustia, segirtad e sanadad, drizzada la mesemna passada a tut las vischnancas sursilvanas. En quella vegn il departament a la conclusiun che la vischnanca na dastga atgnamain far naginas cunvegnas cun chasas da vegls e da tgira u cun instituziuns da sanadad sche quellas han gia fatg cunvegnas cun corporaziuns da vischnancas.
