L'onn che vegn sto la vischnanca da Sagogn occupar quasi l'entira suprastanza da nov. Il president communal Thomas Candrian aveva gia ditg ch'el na stettia betg a disposiziun pli sche la fusiun cun Schluein, Laax e Falera na reusseschia betg. La vicepresidenta Martina Beeli sto chalar pervi da la limitaziun dal temp d'uffizi.
Demissiunà han il responsabel per la scola, Georg Felix, il suprastant da bajegiar, Raphael Egli e l'entira cumissiun da bajegiar cun Michael Caderas e Guido Gartmann. Sfurzà da chalar suenter 12 onns è era il president da la cumissiun da quint e gestiun, Remo Cahenzli. Cun el demissiuneschan ils dus commembers Carla Conrad e Guido Tschuor. E la glista va vinavant: Sco davos inditgescha la glista il num da Richard Jezler, dapi blers onns commember da la cumissiun turistica «sagognturissem». Mo la responsabla dal turissem ed infrastructura, Katrin Blumberg, candidescha per ina proxima perioda d’uffizi.
Thomas Candrian chala suenter emprima perioda sco president communal
Il post aveva Thomas Candrian surpiglià amez il process da fusiun cun las vischnancas vischinantas. Suenter esser stà 12 onns commember da la suprastanza aveva el vis la pussaivladad da manar Sagogn tras ina fasa transitorica. El vesia la fusiun sco schanza per Falera, Laax, Sagogn e Schluein, aveva el punctuà suenter sia elecziun en ina intervista cun la FMR. El aveva remartgà ch’el na vegnia betg a star a disposiziun in'ulteriura perioda d’uffizi sche la fusiun na gartegia betg.
Felix Rösel nov mainascola
Avant trais onns eri gartegià, en vista ad ina fusiun, d’occupar tut ils uffizis. Ils 27 da schaner 2023 n'è quella finamira betg gartegiada. Ina maioritad dals funcziunaris na vul ussa betg unfrir pli ditg ses temp liber per la vischnanca. Sco il president communal ha ditg a la radunanza, vegn l’executiva a far ponderaziuns strategicas co manar vinavant la vischnanca. In model da directori, sco en las vischnancas vischinantas, na vegnia dentant betg en dumonda, ha Thomas Candrian punctuà.
A la radunanza communala da preventiv èn las demissiuns stadas ina da pliras orientaziuns. Tranter auter ha il responsabel da scola Georg Felix communitgà che la cumissiun dal Consorzi da scola Laax-Falera-Sagogn-Schluein haja elegì in nov manader general da scola. Quel sa numna Felix Rösel ed è il mument directur da la Scola svizra a Cuernavaca en il Mexico. Cun l’entschatta da l'onn da scola 2024/25 vegn el a surpigliar la plazza da Gion Caviezel che va en pensiun anticipadamain.
Vinavant ha la suprastanza communala orientà da la Reit da sanadad Surselva. I saja impurtant dad esser solidaric entaifer la regiun, la fundaziun da la societad rinforzia il sistem da sanadad da la Surselva. Per purtar il deficit dal Spital regiunal Surselva e tenor la clav da repartiziun sto Sagogn impunder mintg’onn 192'000 francs. En connex cun il traffic public ha il president communal infurmà ch’el vegnia a s’engaschar che las lingias dals autos da posta Glion-Fidaz-Falera resguardian sco empermess era il vitg da Sagogn.
Refusà la concessiun a la OEZ
La suprastanza communala da Sagogn ha gì da prender posiziun pertutgant la dumonda da renovar la concessiun a las Ovras electricas Zervreila SA (OEZ). La vischnanca da Sagogn è participada cun 2% vi dal contract e fa era part dal consorzi da las vischnancas concessiunarias. Sa basond sin la recumandaziun da regenza grischuna e Cussegl grond, sco era sin la decisiun dal consorzi, ha la radunanza decidì unanimamain da refusar la dumonda. La concessiun scroda ils 31 da december 2037. Ina nova regulaziun dettia a las vischnancas ed al chantun la schanza unica da prender en ina rolla pli activa en il parc da las ovras idraulicas da la OEZ, argumentescha la regenza.
La radunanza communala da Sagogn ha plinavant confermà il pe da taglia per 2024. Quel resta sin 80%, medemamain quel da la taglia sin giaschom sin 1,5 ‰. Cun quellas quotas quinta il preventiv communal cun in quint gulivà e solid tar entradas ed expensas da radund 4,64 milliuns francs. Il quint d’investiziuns mussa expensas da 549'000 ed entradas da 1'662'500 francs. La gronda part pertutga vias, aquaduct e chanalisaziun. Il suveran da Sagogn n'ha era betg fatg objecziuns en connex cun ina dumonda da credit per in vehichel da pumpiers. Unanim han ils preschents approvà la summa dumandada da 110'000 francs. Era las vischnancas da Schluein e Falera ston remplazzar lur medems vehichels che fan part dal consorzi dals pumpiers da las quatter vischnancas. La finala ha la radunanza anc approvà il preventiv 2024/25 dal Consorzi da scola Laax – Falera – Sagogn – Schluein.