Rita Schuoler - «Spetgar fin ch’ins po avrir»

La situaziun saja segir era frustranta, di Rita Schuoler che ha lavurà sia entira vita en la gastronomia. Ma pers la speranza n’ha ella betg. Suenter avair manà 14 onns il restaurant Cresta a Segnas era ella sa decidida suenter la stad da betg pli far d'ustiera. Il motiv era che la chasa, nua ch’il restaurant Cresta è suten, è vegnida vendida dals possessurs. Ina cuntinuaziun n’èra betg pli pussaivla.

Ma suenter esser stada dus mais a chasa ha la dunna tschertgà ina nova sfida. Uschia èsi vegnì, ch’ella ha prendì si contact cun Vrena Werth, la possessura da l'hotel Rhaetia. Alura èsi ì svelt ed il november ha Rita Schuoler suttascrit il contract da prender a fit sulettamain l’ustaria. L'hotel lez vegn transfurmà en abitaziuns.

Vegnir e mirar che tut è en urden

Fin uss ha Rita Schuoler dentant betg pudì avrir per ina minuta il restaurant. Quai saja stà l’emprim anc ina situaziun main malempernaivla. Uschia haja ella pudì passentar ils firads da Nadal a chasa. Ma suenter che la situaziun na saja betg sa meglierada, haja ella cumenzà a far ponderaziuns. Uss saja uschia, ch’ella vegnia duas giadas l’emna a mirar che tut saja en urden. Pertge ins na possia betg be far capuns per la schelentera, quels vuless ella era vender als giasts. Ma la malsegirtad ch’ins na sappia, betg cura ch’els possian puspè avrir, saja il mender. Uschia è il pli grond giavisch da pudair puspè dar gas e da pudair lavurar e quai vegnia ella a far l’emprim di, ch’i saja pussaivel d'avrir l’ustaria.