87,4% (1002 vuschs) da las votantas e dals votants da Flem han ditg Gea al project per modernisar il center da sport «Prau la Selva» che duai daventar ina part integrala da la vita communala e porscher dapli activitads da temp liber per tuttas vegliadetgnas e tut'aura. Be 12,6% (145 vuschs) da las votantas e dals votants han refusà il project, 16 cedels da vuschar èn stads nunvalaivels, 11 vids. Cun quest resultat pon las lavurs da renovaziun da circa 20 milliuns francs cumenzar.
Il suprastant da Flem, Nicola Fantini ch'è n'è betg vegnì elegì sco nov president communal, sa legra però dal cler resultat per il project Prau la Selva che duai daventar in nov center da sport e temp liber. Sco suprastant era el responsabel per il project.
El sa legria fitg che Flem haja ussa chattà ina schliaziun, la quala vegnia sustegnida d'ina talmain gronda maioritad, ha ditg Fantini sin dumonda da RTR.
Pli gronda purschida da sport a Flem
L'implant da sport Prau la Selva a Flem duai daventar in center da sport e da temp liber. La purschida da sport duai vegnir engrondida ed era l'entira purschida da sport da glatsch duai da nov sa chattar en il center da sport modernisà. Per uniuns e champs da sport duai era dar alloschis. Plinavant vulan ins porscher ina nova plazza da camping e glamping. Il Touring Club Svizra (TCS) che maina gia uss la plazza da campar actuala a Flem, duai era daventar la gestiunaria dal center da sport.
Da nov duai resultar in gudogn e betg pli in deficit
Sco la vischnanca da Flem di, saja l'implant da sport che deriva dals onns 1980 memia vegl. Actualmain fa l'implant da sport mintg'onn deficits che la vischnanca sto la finala purtar. Cun quest project vulan ins cuntanscher in gudogn.
Tge custa quest project?
Ils custs per l'entir project muntan a bunamain 25,9 milliuns francs. Las vischnancas da Flem (20 milliuns), Laax (3 milliuns) e Falera (1 milliun) duain surpigliar la gronda part dals custs, pia en tut 24 milliuns francs. Il rest dals custs vegn repartì sin differents acturs.
La renovaziun dal Prau la Selva è previs sco project regiunal. Per quest intent vulan las trais vischnancas fundar ina societad en furma giuridica d’in institut independent dal dretg public. Quest institut purtass la responsabladad e las vischnancas dotassan el cun il capital necessari per realisar l’investiziun.
Gia cler è che la populaziun da Flem sto votar davart quest project ils 22 da settember. Sco tschellas vischnancas Laax e Falera procedan n'è anc betg enconuschent.
Gia il passà hai dà plirs projects, dentant senza success
Dapi onns vegn fatg concepts per il center da sport Prau la Selva ch'han la fin finala dentant mai cuntanschì il grond sustegn. Il project è lura ì vinavant a la nova suprastanza suenter las elecziuns dal 2020. Lezza ha lura cun ils novs commembers lavurà ora quest project. Il 2020 avevi dà la discussiun sch'ins vul mantegnair e sanar la halla da glatsch – quai sin basa d'ina iniziativa ch'è dentant mai vegnida a l'urna cunquai ch'ils iniziants han lura retratg quella suenter discussiuns cun la suprastanza. Dus da quests iniziants fan part da la nova suprastanza. Da quest temp aveva la veglia suprastanza vulì spazzar la halla e bajegiar in parc cun purschida sportiva. Ed era gia il 2017 aveva la suprastanza communala proponì da spazzar il center da sport Prau la Selva e da bajegiar en quest lieu in nov ressort da vacanzas, in ressort cun 56 chamonas en il stil da palissadas a l'ur d'in lai artifizial per 32 milliuns francs.
