Sin l’emprima egliada è ina plazza da golf in lieu creà da l’uman e fitg artifizial. Surtut il pastget sto esser curt ed i vegn duvrà blera aua per tgirar tut. Ma quai è be ina vart da la medaglia. L’autra è ch'i dat gia uss plirs hotspots da biodiversitad sin plazzas da golf grischunas. Uschia ha l’Uffizi per la natira grischun fatg observaziuns ad Alvaneu ch’il rustg brin ha sia pli gronda populaziun, da muntada naziunala, sin la plazza da golf ad Alvagni. U ina sort libella, quasi morta ora en Svizra, è sa derasada sin la plazza da golf a Domat. Tut quai èn mussaments ch’ins haja pudì cumprovarussa, di Luis Lietha da l’Uffizi da la natira, manader da project en la sparta amfibis. Els sajan sez stads surstads davart il potenzial da las plazzas da golf.
Far concepts co promover la biodiversitad
L’idea fundamentala è vegnida da Grischun vacanzas e da l’associaziun da golf grischuna. Uschia han ins cumenzà a discutar davart da las pussaivladads ed ha lantschà l’onn passà ina fasa da pilot sin trais plazzas da golf, a Lai, Zuoz e Selva. Ed il president da l’associaziun da golf grischuna Pius Achermann n'ha betg quintà che tut las 12 plazzas da golf grischunas vegnian la finala a far part dal project. Quai saja fitg legraivel e mussia era che la sensibilitad per il tema biodiversitad saja arrivada tar ils clubs da golf associads, uschia Achermann. Els sajan leds ch'era il chantun sustegna il project, surtut tras la cussegliaziun e l’elaboraziun dals concepts, ma era per mintga plazza da golf cun ina contribuziun da 5’000 francs. Las finanzas na sajan betg il tema, ma las plazzas da golf stoppian la finala vulair prender mesiras, sco per exempel plantar dapli plantas u laschar crescher parts dal prà pli ditg, e qua sentia el in grond engaschi da las persunas responsablas per la tgira.
La biodiversitad è part da la lavur
Per la plazza da golf a Sagogn, nua ch’ils responsabels han envidà las medias, è la lavur per la biodiversitad gia uss realitad, declera il greenkeeper Kurt Deflorin. Els veglian era cun lur label mussar ch’els tgiran betg sulettamain la plazza, mabain era tut enturn la plazza da golf. Era interessant è la collaboraziun cun Pro Natura. L’organisaziun d’ambient è vegnida tar il club da golf cun il giavisch da promover ina sort utschè-mezmieur, il rinolof grond, ch’ha sia pli gronda colonia en Svizra en la tur da la baselgia evangelica da Sagogn. Il giavisch è stà da colliar la cuntrada, pia da pussibilitar als animals d’arrivar meglier en lur lieus da chatscha. En tut èn perquai vegnidas plantadas 27 plantas grondas indigenas e passa 200 sorts chaglioms. Questas lavurs sajan uss finidas ed il proxim project spetgia. Ma l’idea è era da sensibilisar tut las persunas che giogan golf en il Grischun. Perquai: Ellas giogan sin plazzas ch’han ina gronda plivalur per la natira, era sch’ins na vesa betg quai sin l’emprima egliada.