Placat d’Opera Viva 2025 - Mirer en mellen

Ils placats da Rudolf Mirer appartegnan tar las occurrenzas da l’uniun Opera Viva sco il «belcanto» tar l’opera. Ils placats che l’artist ha malegià en ils davos onns per l’uniun, han fermamain marcà l’estetica grafica sco er las culissas da l’opera. Quest onn surprenda Rudolf Mirer cun in placat che ha in funs mellen e paucas lingias che spartan quai funs. La colur marcanta melna n’ha enfin da qua betg chattà tant plaz en las ovras da l’artist ch’è da chasa a Sursaissa. Quella colur saja per el er speziala ord quest motiv. Ella serra giu cun ina epoca per el, manegia Rudolf Mirer che ha 78 onns.

En l’avegnir veglia el duvrar quella colur pli savens en sia ovra. Daco che quai è vegnì uschia, na sappia el er betg declerar. Sch’ins dat in sguard sin il placat per l’opera Aïda, alura en ils purtrets da las figuras principalas preschentadas. Saja quai il guerrier egipzian Radamès che duess maridar Amneris ch’è represchentadà in zic pli bass. Sanester da profil e prominent è il purtret d’Aïda, la bella sclava da l’Etiopia. Els trais furman ina relaziun da triangul en l’opera dramatica.

L'art grafic d'Opera Viva: 10 placats en 20 onns

Rudolf Mirer, il manader artistic, Gion Gieri Tuor, ed il reschissur Nikolaus Büchel sa mettan uss vid il concept per las culissas e las parts da la tribuna ch’appartegnan tar l’opera giugada. Era Nikolaus Büchel manegia che la colur melna en tut ses tuns vegnia er ad esser preschenta sin tribuna cun las piramidas ed il desert, cunquai che l’opera Aïda gioga en l’Egipta. Elefants na dettia dentant betg tar quest inscenaziun, manegia Nikolaus Büchel cun in surrir.

2025: l’onn da giubileum

L’auter onn festivescha l’uniun Opera Viva ses 20avel giubileum. La capodovra da Giuseppe Verdi è era ord quai motiv la selecziun da l’uniun. Tenor ils responsabels restia il budget per la producziun vinavant tar 1.2 milliuns francs. L’idea saja d’augmentar las purschidas sper l’occurrenza diversas novas purschidas per las audituras ed auditurs. Pertutgant il chor da l’opera ha Gion Gieri Tuor detg ch’i haja per la producziun dapli persunas che la davosa giada. Surtut er novas chantaduras giuvnas. L’uniun dat sco tact inizial ils concert da la fin da l’onn. Quai er cun ovras talianas, tranter auter da Giuseppe Verdi.

Ord da l'archiv: