Il cussegl d'administraziun da las pendicularas Sursaissa Mundaun ha decidì da metter ord funcziun il runal da Sasolas, cunquai ch'i na rendia betg pli d’investir en in runal deficitar. Quai ha il cussegl d'administraziun communitgà avant in pèr dis en in scriver a ses acziunaris.
Per sanar il runal tranter Sasolas e Plitschès avessan las pendicularas stuì pigliar passa 800'000 francs enta maun. Plinavant avessan ellas stuì investir en in indriz da far naiv – per pudair mantegnair il manaschi da skis sin quest territori.
A mez Sasolas avessi ina funtauna, ma quella n'è betg gronda avunda per far naiv sin l'entir territori.
Cura che las pendicularas da Sursaissa han surpiglià las pendicularas dal Mundaun avant 20 onns pervia da problems finanzials, han las pendicularas gia vulì serrar il runal da Sasolas. Las vischnancas da Glion, Luven e Flond avevan alura pajà a las pendicularas ina tscherta summa per tegnair avert il runal. Dapi lura n'han las pendicularas betg pli investì en il runal ed en l'infrastructura, sco per exempel en ils indrizs da far naiv.
Empruvà tut per salvar il runal
L'uniun purtadra, la Pro Sasolas Plitschès, è durant quels onns s'engaschada per ch'il runal possia restar en funcziun.
Nus avain ils davos onns propi empruvà tut per salvar il runal da Sasolas.
Cun la decisiun da serrar il runal da Sasolas n'han las pendicularas betg pli indrizs sin la costa a l'ost dal Piz Mundaun. Quai deplorescha l'Uniun Pro Sasolas Plitschès. Cunquai che la decisiun da las pendicularas è definitiva, vegnia l'uniun a sa focussar sin il runal da Surcuolm che va si Plitschès, uschia Wolfram Kuoni, il vicepresident da l'Uniun Pro Sasolas Plitschès. Tar quest runal di il president dal cussegl d'administraziun da las pendicularas, Josef Brunner, ch'i na dettia betg plans da serrar el. El saja frequentà bain, surtut pervia da la scola da skis.
L'ustaria da Sasolas e l'albiert «Bündner Rigi» pertutgadas da la serrada
La vischnanca da Luven aveva l'entschatta dals onns 90 bajegià l'ustaria da Sasolas sper la staziun sut dal runal. Quest manaschi appartegn uss a la vischnanca da Glion. Tenor la strategia d'immobiglias era il plan da tegnair l'ustaria e sustegnair persunas privatas che vulan manar la restauraziun. La persuna ch'ha manà l'ustaria durant la stagiun d'enviern ils davos onns ha visà il contract cun la vischnanca sin l'enviern che vegn. La vischnanca vegnia a scriver ora l'immobiglia sco tegia da culm, sco Andreas Pfister, il manader da la partiziun infrastructura e planisaziun, ha communitgà envers la FMR.
La fin dal runal da Sasolas
-
Bild 1 von 3Legenda: Il runal da 50 onns na va betg pli en funcziun. RTR -
Bild 2 von 3Legenda: Pitga dal runal da Sasolas che gieva si Plitschès. RTR
-
Bild 3 von 3Legenda: L'ustaria Sasolas è da la vischnanca da Glion. Senza il runal vegni anc pli grev da pudair dar a fit il manaschi. RTR
Wolfram Kuoni ch'è era il possessur da l'albiert «Bündner Rigi» ha ditg envers RTR ch'il manaschi stoppia reagir sin la serrada dal runal e vegnia uschia a sa drizzar tenor il turissem da stad. L'idea saja da porscher en il futur eveniments culturals en l'albiert da muntogna.
Luven deplorescha la fin da ses runal da chasa
La lutga da 20 onns per tegnair avert il runal da Sasolas è a fin. Uschia vesa quai er l'emprim president da l'Uniun Pro Sasolas Plitschès ed anteriur president communal da Luven, Martin Wetten. La situaziun saja ida en ina direcziun negativa, uschia ch'i na rendia betg pli da far insatge.
Dora Orfei che maina ina chasa da vacanzas cun atelier a Luven dapi passa 10 onns, chatta la fin dal runal da Sasolas fitg donn. Ella manegia che la costa occidentala dal Mundaun saja in territori, da la quala las pendicularas na duessan betg desister. Plinavant speria ella che la pendiculara da colliaziun tranter Glion ed il Piz Mundaun giaja en il futur en vigur.
Or da l'archiv: