L'idea da construir ina pendiculara da Glion sin il Piz Mundaun vegn pli e pli concreta. In studi da realisabladad che la gruppa d'interess R(h)ein & Rauf ha laschà far demussa, ch'il project fiss da realisar. I na dettia nagins obstachels evidents. Tant la realisaziun tecnica ed economica, sco era quella da la planisaziun dal territori e la realisaziun or da vista da l'ambient sajan dadas. La gruppa d'interess haja perquai decis da cuntinuar cun la proxima fasa da project e da lantschar en las vischnancas pertutgadas tut las premissas da planisaziun per il project, scriva la gruppa.
Ina destinaziun attractiva sur l'onn
La finamira concreta dal project saja da realisar ina telecabina che collia quasi directamain il Rain cun il Piz Mundaun. Cun la telecabina duain cunzunt vegnir sviluppadas activitads da stad. Per las activitads d'enviern duai l'indriz servir sco access a la rait da viafier. Cun agid da quest project duai la regiun enturn il Piz Mundaun daventar ina destinaziun attractiva durant tut l'onn. Il project duai ultra da quai promover l'economia en la regiun ed augmentar las pernottaziuns.
Resuns positivs per la proxima fasa
Sco quai che la gruppa d'intress scriva, sajan tant las suprastanzas communalas da las vischnancas da Ilanz/Glion e Sursaissa Mundaun sco era il cussegl d'administraziun da las pendicularas Sursaissa Mundaun persvas che l'idea d'ina telecabina da Glion sin il Piz Mundaun stoppia vegnir persequitada vinavant. Ils gremis ch'han la finala da decider han uschia dà suatientscha a la proposta da la gruppa da lavur e dà liber ils meds finanzials per la proxima fasa.
Per elavurar l'idea d'ina pendiculara da Glion sin il Piz Mundaun era vegnida fundada l'october 2021 la gruppa d'interess R(h)ein & Rauf. Part da questa gruppa èn las vischnancas Ilanz/Glion, Lumnezia e Sursaissa Mundaun, sco era ils acturs economics e turistics, il post da svilup regiunal (Regiun Surselva), las pendicularas Sursaissa Mundaun e la gruppa d'interess da possessuras e possessurs da segundas abitaziuns Surselva. Per sclerir en in emprim pass sche l'idea fiss insuma da realisar era vegnida incumbensada il 2022 la firma Provisio SA cun l'incarica da far in studi en chaussa – il studi numnà survart.
