Cun il pass da skis Surselva èsi pussaivel d'ir cun skis tar tut las pendicularas en Surselva senza limitaziun. La suletta restricziun datti tar l'Arena Alva a Laax nua ch'ins sa mo ir tschintg giadas per enviern cun skis. Ma era Sedrun ha avant in onn stuì limitar las entradas cun il pass da skis Surselva sin set dis. La situaziun dals pretschs da las cartas da stagiun era numnadamain sa midada suenter che l'interpresa «Vail Ressort» aveva cumprà las pendicularas d'Andermatt-Sedrun.
En l'avegnir duain ins dentant puspè pudair ir cun skis tar las pendicularas Andermatt-Sedrun senza restricziuns sch'ins ha il pass da skis Surselva. Per che quai è pussaivel han ins tenor Silvio Schmid, il mainaproject tar l'Andermatt-Sedrun Sport AG, stuì adattar singuls pretschs dal pass da skis Surselva, cunzunt tar ils uffants. Quai saja stà necessari per ch'il pretsch da la carta da stagiun Andermatt-Sedrun saja puspè sut il nivel da quel dal pass da skis Surselva.
Tras questa gulivaziun dals pretschs han ins pudì dir: bain, nus sa participain puspè cumplainamain.
Las midadas da l'onn passà sa mussan er en las cifras ch'èn vegnidas preschentadas a la radunanza dals delegads. Entant che las entradas èn s'augmentadas per 25% en Surselva, en quellas sa reducidas a Sedrun da 2400 sin anc 900 – ina diminuziun da var 60%. Silvio Schmid concluda che quai saja ina consequenza directa da la restricziun da l'onn passà. Igl haja dà pliras reclamaziuns e plirs hajan sco reacziun sin la restricziun evità d'ir cun skis ad Andermatt-Sedrun.
Cunzunt per da quels che vegnivan forsa bler en nossa regiun, è quai schon stà il motiv da vegnir pli pauc.
Era per l'uniun da las Pendicularas Surselva saja impurtant d'avair tut las pendicularas «en la bartga», di il commember da la suprastaza Beat Zenklusen:
Il giast ha gugent in'offerta chapaivla. Sch'i dat dentant dapertut limitaziuns d'entrada è quai cumplitgà per tuts. E products cumplitgads na pon ins simplamain betg vender bain.
Ulteriuras decisiuns da la radunanza
Sper la dumonda da participaziun ha la radunonza generala era giu d'eleger dus novs commembers per la suprastanza da l'uniun. Ils delegads han reelegì lur president Markus Good. Da nov part da la suprastanza fan il mainafatschenta da las pendicularas da Breil, Ivo Maissen sco era Senta Gautschi, la responsabla per las pendicularas da l'Arena Alva. Il quint da l'uniun mussa expensas ed entradas da bun 90'000 francs. El è vegnì approvà unanimamain.
