La pausa dal Glacier Express vegn savens nizzegiada da la viafier Matterhorn Gotthard (MGB) da far lavurs da mantegniment vida il traject da viafier. Uschia er quest onn nua che bus remplazzan il tren a partir dals 14 d’october fin e cun ils 10 da november. Las lavurs vegnan fatgas gist en plirs lieus, in da quels è la punt avant la staziun da Sedrun, declera il responsabel dal mantegniment da l’infrastructura da la MGB per la regiun da Ursera fin a Mustér Peter Baumann. La serrada totala dal traject da viafier fetschia adina senn, per l’ina puncto segirtad, per l’autra per pudair far las lavurs a moda effizienta e svelta, uschia Baumann. Probabel vegnian els era l’auter onn a stuair serrar il traject sur il Pass Alpsu, pertge els na vegnian betg da finir quest onn tut las lavurs.
Il traffic vegn fatg cun ils bus
La MGB ha gì scrit ora l’incumbensa da manar il traffic da bus sur l’Alpsu. La finala survegnì quest pensum ha in’interpresa da Son Gagl. Ils bus da «Sarganserland Werdenberg» fan part da l’interpresa dals bus da la Svizra Orientala. Lezza gestiunescha en ils chantuns da Son Gagl, Turgovia ed en il Principadi da Liechtenstein pliras interpresas da bus cun var 550 manischunzas e manischunzs da bus. Per vegnir da porscher tut quai ha l’interpresa dumandà tgi ch’ha interess. Els hajan pliras persunas che sajan s’annunziadas ed uschia propi pudì tscherner quellas persunas che han gia experientscha da charrar en las muntognas e surtut era da charrar sin naiv, di il manader Andreas Baumgartner.
Viver e lavurar ensemen
Per ils tschintg manischunzs e la manischunza ha l’interpresa prendì a fit ina chasa da vacanzas a Selva en Tujetsch. Quai fetschia senn da prender a fit ina chasa en in lieu bain cuntanschibel davent da Mustér e da Andermatt ed uschia è Selva stà la meglra opziun, declera Andreas Baumgartner. E la convivenza ha funcziunà bain, di la manischunza Elisabeth Dürst, era sch’els n’enconuschevan betg in l’auter. Las experientschas fatgas sajan tras a tras bunas, di la dunna ch’abitescha a Walenstadt. Cura che l’interpresa ha dumandà tgi che veglia surpigliar questas incumbensas ha la dunna che maina bus dapi in onn e mez betg targlinà mabain immediat pensà che quai saja ina bella aventura. La cuntrada, la glieud e la ruta alpina sur il pass han plaschì bain a la dunna. Ella prendia bleras experientscha a chasa ed ella returnia segir l’enviern en la regiun per ina giada ir cun skis. Quai saja stada ina aventura ed in zic sco vacanzas, di Elisabeth Dürst.