La Somedia ha annunzià la surpigliada da l'agentura communicaziun.ch. Ella veglia fusiunar l'agentura da marketing cun sia atgna agentura Viaduct, e tegnair il num communicaziun.ch. Quai munta, che l'agentura da 20 collavuraturs (Viaduct) e da 60 collavuraturs (communicaziun.ch) daventan la pli gronda agentura dal Grischun. Quai è tut en il senn da la Somedia, che vul, dasper lur pitga principala da las medias, era avrir in nov segment; agenturas.
Nus tschertschain anc autras pitgas che be quella da las medias, nua che nus pudain generar creschament.
Tenor la Somedia duai la nova agentura fusiunada esser a la testa da las purschidras da marketing e communicaziun en il Grischun. La Somedia investeschia en in'interpresa ch'ha success. Cun la surpigliada vul ella engrondir la purschida per sia clientella, stgaffir novas plazzas da lavur e rinforzar sia strategia d'agenturas.
Reglar ad uras
Armin Spescha, il mainafatschenta e possessur actual da communicaziun.ch, resta mainafatschenta. Reglar la successiun ad uras è stà fitg impurtant per el. Pertge en ses mintgadi vesia el savens interpresas ch'hajan difficultads exact cun il reglar la successiun.
El sez ha gì trais opziuns: L'emprima era da guardar en famiglia, la segunda en fatschenta. Ma naginas persunas han gì interess da surpigliar l'interpresa cun 60 collavuraturs. Uschia èsi vegnì a la terza varianta: Vender. Tuttas 150 aczias tutgan ussa pia a la Somedia. Per tge pretsch che Spescha haja vendì ellas na vul el betg tradir envers RTR. Tras la fusiun da las agenturas maina el da nov in'interpresa cun 80 collavuraturas e collavuraturs.
Dapi ch'jau hai fundà la fatschenta hai jau ditg, ch'jau vuless savair a partir da 50, 55 onns co i va vinavant cun mia fatschenta.
Cumenzà aveva Armin Spescha ensemen cun Flavio Dermon il 2008 a Glion. Il 2015 è lura vegnì expandì a Cuira, il 2020 èn els vegnids undrads cun il pretsch da Prix Montagne. Ed uss, il 2023, la vendita. Las plazzas e las sedias a Glion ed a Cuira duain restar. Il prim da mars 2024 duain las agenturas fusiunar.
