Nordiculinaric - Dapi 10 onns vegn fatga la cursa da passlung cun culinarica

La cursa da passlung che cumbinescha la culinarica cun il sport da passlung è ina cursa da tradiziun. Tut cumenza a Trun en la scrinaria Maissen nua ch’in brunch spetga sin las curridras ed ils curriders. A partir da las 10:00 partan tut las curridras ed ils curriders che van en il stil classic, mes’ura pli tard tut quels che partan en il stil liber.

A la partenza van quasi 150 curridras e curriders. La finamira è betg da cuntanscher il meglier temp, pertge lez na vegn betg mesirà. La finamira principala è da giudair in bel di da cumpagnia cun purschidas culinaricas. Uschia parta la cursa a Trun, va fin a Mustér ed enavos a Trun. En dus lieus spetgan refrestgs e pausas da rinforzar cun ina schuppa da giutta.

Tradiziunalmain fa la cursa in paus a Surrein en la destillaria da vinars nua ch’ins po degustar las spezialitads brischadas a Surrein. Alura cuntinuescha la cursa fin a Trun nua ch’in gentar da cuminanza spetga. Il spezial è ch’ins na sto betg far l’entir traject, pia i dat ni posts da controlla ni posts che mesiran il temp. Era pon ins currer persul u en gruppas ubain gist tenor situaziun.

Il 2021 fiss gia stada l’ediziun da giubileum, ma alura è vegnida la pandemia da corona ch'ha fatg stuschar duas giadas l’occurrenza ed ils dus ultims onns mancava la naiv. Uss, il 2025, po l’ediziun da giubileum finalmain vegnir manada atras.