Mustér - Adrenalin è garantì – la scarsolera nova è quasi finida

«La scarsolera è in'attracziun supplementara», di il directur da las pendicularas da Mustér Stefan Arnold. En la vischinanza na dettia nagina purschida sumeglianta. Per il cumenzament da la stagiun è planisà dapli persunal, ma pli tard cura che tut funcziuna tanscha ina singula persuna per il manasch tenor Stefan Arnold. Il pli impurtant pertutgant il mantegniment saja la segirtad. Lur experientscha cun pendicularas e runals saja d'avantatg, perquai ch'il mantegniment da quels indrizs saja cumparegliabel.

Scarsolera pitschna tras il guaud

La scarsolera sezza da radund in kilometer n'è betg lunga. Ma era l’ascensiun è spectaculara: Il giast entra en il car en design da la furmla 1 ed ascenda radund duas minutas d’ina rampa. Arrivà sisum vegn la corda schliada e la descensiun cumenza. Ils cars cuntanschan ina spertadad maximala da 45 kilometers l’ura.

I saja pussaivel da franar ed ils cars na possian betg collidar – quai saja impurtant per ch'era famiglias possian nizzegiar la purschida.

Investiziun da dus milliuns francs

«Las pendicularas da Mustér vulan augmentar la visibilitad cun la purschida», di Stefan Arnold. La purschida saja unica en la regiun e perquai era attractiva. Per charrar sin la nova scarsolera sto vegnir cumprà in bigliet supplementar. Ma el saja persvas che blera glieud che vegn cun skis a Mustér vegn er ad ir anc cun la scarsolera nova. Surtut durant la stad spera il directur da las pendicularas da pudair attrair dapli giasts. La stagiun auta na saja quai nagin problem, la sfida saja da promover il turissem permanent. «Ina scarsolera è ina purschida ch’ins po nizzegiar da tut aura e durant mintga stagiun», declera Stefan Arnold. La scarsolera nova vegn averta ils 20 da december 2024.