Mintga fin da l'onn organisescha la vischnanca da Lumnezia il «marcau Daniev». Quel circulescha da fracziun a fracziun – quest onn è Vrin stà en roda. Ina roschada da persunas ha fatg il viadi ed ha visità il martgà en las streglias da Vrin.
Cundiziuns perfetgas e daletgs gastronomics
Ins avess strusch pudì giavischar in meglier di per il «marcau Daniev» a Vrin. Bellezza aura e temperaturas fraidas, ma betg fradaglia. Durant entrar en las streglias da Vrin chattan ins commembers da la musica da Vrin vid sunar. Igl è curt avant las 11 ed il sulegl entscheiva a splendurar sin il vitg.
Vrin è insatge tut spezial – las bellas chasas veglias, muvels e nagins autos sin via. Propi idilic!
Blers stans han purschì bubrondas cun e senza alcohol – uschia era il stan «Uniun da cultura e beinstar Zungenbiss» dals set giuvens. Per quels ch'han fom hai dà là in fondue. Schegea che la svieuta saja buna, n'èsi betg il principal per ils giuvens – ch'han per l'emprima giada in stan – da far fatschenta. Els vulian cunzunt vegnir en cumpignia e presentar lur uniun cun l'interessant num «Zungenbiss».
-
Bild 1 von 10Legenda: Bainvegni al «marcau Daniev» a Vrin. RTR -
Bild 2 von 10Legenda: Las streglias èn plainas. RTR
-
Bild 3 von 10Legenda: La musica da Vrin suna. RTR
-
Bild 4 von 10Legenda: RTR
-
Bild 5 von 10Legenda: La pli giuvna uniun da la Val Lumnezia. RTR
-
Bild 6 von 10Legenda: RTR
-
Bild 7 von 10Legenda: artisanadi RTR
-
Bild 8 von 10Legenda: vatgas amez il martga RTR
-
Bild 9 von 10Legenda: las temperaturas n'eran betg usche fraidas RTR
-
Bild 10 von 10Legenda: ... sin seveser l'auter onn ad Uors RTR
Sper stans cun products indigens da tuttas sorts – sco per exempel chaschiel, charn u cristallas – datti dentant era products d'ordeifer sco vestgadira u bischutaria. Era brischavinars cun entirs sortiments da vinars e liquors chattan ins – insatge per mintga gust pia.
Visitaders perfin da Turitg
Indigens, persunas or da l'entira Surselva ed era osps da vacanzas èn s'entupads a Vrin per giudair il «marcau Daniev» da bell'aura. Ins vesa propi blera glieud. Cun set autos da posta zun plains è la glieud vegnida transportada davent da Glion fin a Vrin. Bain inqual ha stuì spitgar sin il proxim auto da posta cunquai ch'el era gia memia plain.
Ins entaupa glieud ch ins na vesa uschiglio onns betg. Quai di entaupan ins els.
Schizunt ina visitadra da Turitg – oriunda da Vrin – è vegnida al «marcau Daniev» per giudair l'atmosfera. Leda declara ella ch'ella ha uschia pudì mitschar da la nebla da Turitg per in di avant che puspè stuair dir adia al tschiel blau . Era ils expositurs èn cuntents cun l'aura e las bunas fatschentas ch'els han fatg grazia als blers visitaders e las bleras visitadras.