Il schaner 2022 hai dà a Laax in accident cun ina pendiculara da la Arena Alva. Ina gondla ch'aveva pendì latiers material aveva sdrimà plirs pigns ed era la finala collidada cun il terren. Il SUST, il Servetsch svizzer d'inquisiziun da segirezza, ch’è responsabel per intercurir accidents da trens, bastiments e pendicularas ha ussa publitgà ils resultats da la interrogaziun.
Ils 5 da schaner 2022 aveva ina cabina da la gondla che maina davent da Laax sin il Crap Sogn Gion gì la collisiun l'emprim cun intgins pigns e la finala cun il terren. Chargiada era la cabina cun 35 osps e suten cun ina barella da transport chargiada cun material.
En il rapport final vegn il SUST tar la conclusiun, ch'igl ha dà quatter facturs ch'han manà a l’incap. Per l'ina era il sistem da mesirar la paisa deactivà tar la cabina pertutgada, entras quai n'ha nagin percurschì che quella era surchargiada. Vinavant saja vegnì transportà cun quai defect sper il material en la barella il medem mument era giasts cun la gondla. In ulteriur factur saja stà che la paisa dal material pendì vi da la gondla era vegnida quintada fallà e la finala era il mainacabina pir dapi 12 dis en acziun ed aveva uschia mo pauca experientscha. Las mancanzas ha l'Arena Alva eliminà suenter l’accident.
Il rapport numna dus deficits da segirezza, per l'ina il sistem da mesiraziun che mancava, per l'autra ina furmaziun betg cuntentaivla. A l'Arena Alva ha ella dà avis da segirezza en quai connex.
