«Jau chat ch'jau hai ina bella vita ed jau fatsch vairamain fitg gugent quai ch'jau fatsch», di l'um da 31 onns. Ses plan saja adina stà da daventar actur professiunal, curt ses plan A. In plan B n'haja perquai betg duvrà. Cun 16 onns ha el bandunà il dachasa per ir en l'America ed emprender l'englais, silsuenter è el ì a Berlin per far la scola d'actur.
Directamain suenter la scola era mes patratg: ah, sch'jau pudess viver da quest job, fiss quai gie gailira. In mais pli tard ha quai gia funcziunà. Uss è la finamira che quai restia uschia.
Caviezel ha gì engaschaments en chasas da teater, ha giugà en films, fatg reschias ed oz lavura el sco actur liber. Quai funcziunia fitg bain, dentant dovria questa via era in engaschament cumplain per adina puspè avair avant egl nua ch'il proxim engaschament pudess esser. Ina bella vita, ritgs na vegnian ins dentant betg cun quella via, manegia el riend.
Il teater «9 Monate all inclusive» ha puspè manà Caviezel a Cuira. Las producziuns èn stadas vendidas ora, in success cumplain per il toc da teater ch'el ha scrit sez. Ina sfida saja quai stà, cunzunt chapir tge pleds che funcziunan, tge sgnocca che va si ed il timing per il toc – tut quai na saja betg stà simpel.
