Ina perditga dal temp passà - Museum a Tujetsch cun ina raritad locala

La pigna dal «Hafner da Bugnei» è ina raritad, e la suletta pigna da plattinas reconstruida or da la manufactura da vaschella dals Deragischs a Bugnei. Cumenzà a lavurar a Bugnei ha Sep Antoni Deragisch il 1835, suenter l’emprendissadi sco vaschler en la regiun tudestga Allgäu. Dasper la producziun da vaschela vuleva el era far pignas da plattinas. E perquai ha el construì il 1840 per sia chasa duas pignas, era per pudair mussar quellas a pussaivels clients, declera il manader dal museum La Truaisch a Sedrun Tarcisi Hendry. Ma el n’ha betg gì il success giavischà ed ha tenor ils cudeschs da lavur sulet anc fatg ina pigna en Tujetsch, uschia Hendry. La finala è la pigna uss reconstruida vegnida cumprada ils onns 1980 dal Museum retic a Cuira, ed era dapi lura deponida en stgatlas en tschaler. Sin dumonda da Tarcisi Hendry ha il Museum retic uss dà ad emprest la pigna al museum tuatschin, cun tschertas cundiziuns.

La pigna sto esser accessibla al public

Ina da questas pretensiuns è che la pigna vegn era exponida en il museum. Perquai ha il museum incumbensà il tschentapignas Ignaz Deplazes da Surrein da reconstruir quella tut a moda professiunala. El vegn accumpagnà d’ina restauratura dal Museum retic, Martina Nicca. Per ella èsi l’emprima giada ch’ella reconstruescha ina tala pigna ed ina experientscha unica. Mesirar ora tut bain per che quai haja alura era plaz en la stivetta è stà impurtant. Alura haja sulet la tocca stuì vegnir plazzada en il dretg lieu, declera la restauratura. Ed era per Ignaz Deplazes èsi ina interessanta incumbensa nua ch’ins po era improvisar – e reconstruir ina pigna da 180 onns saja spezial.

Stivetta dal «Hafner da Bugnei»

Dasper la pigna ha il museum uss endrizza ina stivetta cun duas vitrinas illuminadas nua ch’ins vesa vaschela da Bugnei fatga da las duas generaziuns dals Deragischs tranter ils onns 1840 e 1920. La pigna ch’ins na po betg stgaudar cumplettescha uschia l’exposiziun, ed è in unicum en questa moda, di Tarcisi Hendry. Il cumenzament da la stad vegn il museum La Truaisch alura a far ina purschida speziala en connex cun il «Hafner da Bugnei».