Tranter 180 - 200 peschs
Norbert Vinzens ha entschet ad ir a pestga gia cu el aveva 16 onns. Pli baud devia quai pli blers peschs. En ses megliers onns haja el piglià tranter 180-200 peschs ad onn. Ed ina giada haja el schizunt gì in scarun da 3,5 kilos vid la lantscha; e quel haja l'ustier dal Kistenpass vulì.
Anc adina è l'um che è naschì il 1944, creschì si a Trun e viva oz a Sedrun, nua ch'el ha instruì, fascinà da la pestga. Cura ch'el sa metta la damaun sin via na piglia el – ch'è era chatschadur – betg mo la lantscha, mabain era il perspectiv per observar ils animals selvadis.
Il pli bel è da levar ed ir la damaun marvegl cura ch'i vegn cler ed ils utschels chantan.
200 lais e var 1'700 flums ed auals: En Grischun datti blers lieus per ir a pestga. Norbert Vinzens pestga dentant il pli savens en il Strem, tranter Sedrun e Rueras.
Suenter las 8:00 uras n'ha il pestgader passiunà anc tschiffà nagins peschs. Quai malgrà che l'aura saja ideala – numnadamain surtratg, plitost frestg ed i pluschignia in pau. Tenor Norbert Vinzens «stoppian ils peschs anc sa dasdar in pau, suenter l'enviern». Il Strem, l'aual tranter Sedrun e Rueras, saja da principi in bel aual per pestgar. Cun in pau fortuna possian ins tschiffar insaquants peschs – entaifer las limitas dal di, sa chapescha.
Puspè vegnan bagnads ils verms. Buna pestga e che Son Peder stettia cun Vus.
E betg emblidar da mussar a nus Voss #muments da #pestga21. Tramettai Vossas impressiuns da l'emprim di da pestga sin social@rtr.ch u directamain sur Facebook u Instagram .