Hans Caprez è stà in dals pli enconuschents schurnalists investigativs da la Svizra. Suenter il seminari da magisters a Cuira è el stà scolast primar en il Grischun e pli tard in temp schurnalist tar la Gasetta Grischuna. Da 1971 fin 1998 ha Hans Caprez lavurà tar il Beobachter. Sia istorgia la pli enconuschenta da quels onns è stada quella dals «Affons da la via», nua che Pro Juventute ha prendì davent sistematicamain ils uffants a las famiglias dals Jenics ed als ha incorporà en instituziuns d'educaziun u famiglias da tgira.
Adina per ils dischavantagiads
Tenor la revista «reformiert.ch» che ha purtretà Hans Caprez avant paucs onns, è il schurnalist dal Beobachter stà participà tranter auter a las retschertgas en connex cun il spiunadi da l'uffizier Jean-Louis Jeanmaire e dal fraud fiscal da Hans W. Kopp. Avant 11 onns è Hans Caprez turnà a Castrisch suenter ina dimora da plirs onns en il Piemont. Qua è el s'engaschà per la lingua rumantscha ed è era stà president da la Partida socialdemocratica da la Surselva.
Durant ils ultims onns è Hans Caprez stà sfurzà da viver cun ina malsogna da cancer ch'ha chaschunà adina dapli impediments en la vita da mintgadi.
Bernard Cathomas sa regorda da Hans Caprez
En l'intervista cun RTR raquinta Bernard Cathomas – l'anteriur directur dad RTR e secretari general da la Lia Rumantscha – da Hans Caprez, sia influenza e ses fastizs. Els han adina gì contact in cun l'auter, saja en lur funcziuns professiunalas, ma era privat. Qua chattais in extract da l'intervista a scrit:
RTR: Tge persuna era Hans Caprez sper sias istorgias schurnalisticas?
Bernard Cathomas: En emprima lingia in fitg char e fidaivel concarstgaun. El era in um cun empatia. El saveva sa viver en en autras tenutas ed auters patratgs. El era in contemporan fitg engaschà ed in schurnalist da vaglia che na veseva betg mo las chaussas, mabain che pudeva era scriver quellas uschia che tuts chapivan – in che steva en e ristgava era mintgatant da provocar. El era in Rumantsch fitg curaschus che steva er en per novas chaussas cun ina clera tenuta e cun fitg buns arguments. Tut en tut era el in carstgaun singular, in sco ins less che tuts fissan – sch'ins dastga dir uschia – en sia tenuta umana e per la chaussa.
Suenter la Gasetta Grischuna ha Caprez lavurà blers onns per il «Beobachter». Là era el era enconuschent per dar ina vusch als flaivels sco schurnalist. Sa mussa quai credo ch'el aveva durant sia lavur era en sia persunalitad?
Fitg expressiv, star en per ils falombers e flaivels, dar ina vusch a quels che n'han betg ina – quai era fitg impurtant per Hans Caprez. Surtut era la giustia e da mirar: nua succedan chaussas che na dastgan betg succeder? Exprimer quellas e mirar ch'ellas sa midian – quai numnav'ins pli baud «anwaltschaftlicher Schurnalismus». Il schurnalist è in advocat per las chaussas ch'el represchenta, tge che na dastga oz betg adina esser uschia. El è stà en per ils Jenics, s'engaschà per persunas persequitadas, per mantegnair la natira e cunter surbajegiadas extremas. El è stà en dapertut nua ch'el aveva il sentiment ch'insatge n'era forsa betg uschia sco quai ch'i dastgass esser – la gieva el suenter, guardava, chattava, publitgava e debattava. Quai era ina tenuta schurnalistica fitg profunda.
Ina da las pli enconuschentas istorgias era quella dals «Affons da la via». Quant impurtanta era tenor Vus quella istorgia era per il schurnalissem svizzer?
Quai è in'istorgia simbolica per bleras chaussas en Svizra ch'èn – tge cletg – sa midadas. Hans Caprez è ina da las persunas ch'han fatg cler chaussas ch'èn succedidas pli baud, che na van betg pli oz e ch'ins sto curreger. Quella debatta, quai entir project «Kinder der Langstrasse» nua ch'el ha demascrà la Pro Juventute ed è stà davos quels uffants. El è er adina puspè stà en per quai ch'è «gest e duaivel» – sco el schess – cunter grevas attatgas da persunas da pussanza e n'ha betg temì sch'i vegniva smanatschà. En quai senn è gist quella acziun «Kinder der Langstrasse» in'entschatta impurtanta en Svizra da sclerir si chaussas ch'ins ha adina zuppentà. Quai èn suenter lur anc vegnidas autras chaussas – Hans Caprez è stà in dals emprims ch'ha ditg: Nus stuain discurrer da quai che nagin na vul propi discurrer.
Era spezial vi d'el era ch'el tegneva adina bun contact cun las persunas da las qualas el scriveva.
Gie, el na steva – sco in vair schurnalist – betg mo en per quels ch'el defendeva, ma era per quels ch'el attatgava. El prendeva era si cun lezs contact e scheva: «Jau hai udì quai e quai. Vus vegnis accusads, vus avais il dretg da prender posiziun». El viveva propi ils principis dal bun schurnalissem. Quai ha fatg el enconuschent e renconuschì.
Nua ch'el n'ha betg survegnì tanta renconuschientscha: El è vegnì elegì sco secretari general da la Lia rumantscha, ha dentant survegnì blera critica ed è gnanc entrà en l'uffizi. Co resta quai temp en memoria a Vus?
Quai eran schon temps in zic burascus, perquai che quai moviment rumantsch viveva – qua na pudevani betg mo simplamain eleger insatge gist mo uschia. Quai era adina da far l'equiliber, la ballantscha tranter l'Engiadina, ils catolics e refurmads ed ils vegls e giuvens. Quai era in temp en sasez fitg interessant nua ch'i deva discussiuns. Hans Caprez n'è lezza giada betg entrà en l'uffizi perquai ch'el aveva survegnì clers signals ch'exponents da la regenza n'avessan betg acceptà el senza ch'el avess sa perstgisà per sia lavur schurnalistica ch'el aveva fatg – e quai na vuleva Hans Caprez betg far. El na vuleva era betg – quai era tipic per el – entschaiver in post nua ch'el vegn gia da l'entschatta boicottà.
Quai «fieu rumantsch» aveva Hans Caprez gie era. El n'ha betg mo laschà enavos fastizs schurnalistics, ma era fastizs per il rumantsch. Tgenins?
El è stà in ch'ha adina detg: Nus stuain tegnair quellas uniuns che nus avain. El è stà en la Renania – che n'exista betg pli – e per quellas organisaziuns ch'el scheva: «sche quels èn silmain in pèr ch'èn qua e cumbattan». El è era stà en immediat cura che nus avain lantschà las discussiuns per il rumantsch grischun, per la gasetta quotidiana e per la reconuschientscha dal rumantsch sco linguatg uffizial. Quai na sa chapiva betg da sasez da lezs onns – qua devi blers che guntgivan, ch'eran en sasez gnanc encunter, ma na ristgavan betg da s'exprimer uschè cler sco Hans Caprez. Quai m'ha adina fatg impressiun: Sch'el aveva il sentiment, era persvadì ed aveva ils arguments, lura steva el en e na sa zuppava betg u scheva «jau na detg nagut». El era in che scheva. Cun quai ha el era survegnì la renconuschientscha ch'el ha.
Or da l'archiv
