Tar in grev accident da venderdi suentermezdi èn mortas duas persunas, ed ina persuna è blessada. Sco quai che la Polizia chantunala communitgescha è in camiun schlittrà en ina storta sin la via bletscha, ed è collidà cun in camper ed ina moto che vegnivan encunter. Suenter sajan il camiun ed il camper vegnids giud via e ruclads la spunda giuadora.
Ina persuna mora anc al lieu
La manischunza dal camper saja stada bloccada en il vehichel. Malgrà emprim agid immediat e l'acziun da salvament dal team Surselva, è la manischunza morta anc al lieu. Sia figlia da 14 onns è vegnida blessada mezgrev ed è en l'Ospital chantunal a Cuira. Era la motociclista è vegnida sgulada en l'ospital cun blessuras grevas. Sonda saira è ella lura morta en l'ospital. Il manischunz dal camiun è mitschà senza blessuras corporalas.
Via da l'Alpsu è stada serrada per passa 6 uras
Durant l'acziun gronda da salvament è la via da l'Alpsu stada serrada tranter las 15:00 e las 21:30, uschia ch'il traffic vers l'Alpsu ha stuì sviar sur Sursaissa. La Polizia chantunala e la Procura publica chantunala sclereschan anc l'andament exact da l'accident – e las raschuns detagliadas.