La nova staziun da Glion cun il nov edifizi ed il nov parcadi per ils autos da posta è sin buna via. Sco quai che la vischnaunca da Glion ha confermà a la FMR, sajan las protestas liquidadas ed ins possia cuntinuar cun il project.
Il president communal da Glion, Marcus Beer di ch’igl areal da la staziun a Glion saja in dals pli delicats lieus da la vischnanca cura ch’i sa tracti da lantschar novs projects da construcziun. Mo ussa che tuttas protestas sajan liquidadas, possian ins cuntinuar definitivamain cun il nov areal da la staziun.
En in quartier cun binaris cunfinants e pliras interpresas è tut pli cumplitgà cura ch'igl è da planisar.
Tenor il president communal Marcus Beer è la lavur la pli urgenta la nova plazza da parcar dals autos da posta. Quella vegnia bajegiada davent dal settember 2023 en l'ost da la staziun, là nua che la remisa da la Viafier retica stettia anc ussa. Quella remisa vegnia spazzada l'atun 2023. Parallel cun la plazza dals autos da posta vegn la plazza da parcadi e transport a Pendas bajegiada. Marcus Beer di ch’el quintia che la Viafier retica vegnia a pudair cumenzar l'onn 2025 cun sias lavurs per il nov bajetg da la staziun. Las lavurs per il nov edifezi vegnian dentant a cuzzar in temp. Tenor plan duai l’avertura da la nova plazza da la staziun esser l'onn 2028.