Glion - Martgà da famiglias carmala natiers la glieud

En duas hallas da gimnastica da la chasa da scola a Glion hai stans cun da tutta sorts products: Là datti bodies da differentas colurs, in zic vi vart venda in expositur sbavets cun maletgs d'animals. Sper vestgadira datti era sez d’uffants per l’auto. Ni ch'expositurs fan ovras d'art sin basa d'in scan dal corp da la mamma en speranza.

Entiras famiglias visitan il martgà «BAKI» (stat per «Baby Kind»). En la fulla entaupan ins era la fundatura ed organisatura da la BAKI, Sonja Lombriser, che ha cumenzà cun il martgà l’onn 2017. Ella deva alura gia curs da sautar per uffants e giuvenils. Suenter ch’ella haja gì sezza uffants, haja ella plinavant fatg curs per dunnas en speranza ed uschia ha ella visità exposiziuns per famiglias en la Bassa, sa regorda Sona Lombriser. Far uschia insatge a Glion fiss grondius, ha ella alura pensà ed uschia era fatg quai.

L’emprima BAKI aveva 26 expositurs sursilvans, spezialisads sin purschidas per pops. Davent dal segund onn ha Sonja Lombriser engrondì il martgà. Quai cun purschidas per uffants pli gronds. Ussa è la BAKI creschida sin passa 70 stans. L’organisatura quinta quest onn cun var 1’000 visitadras e visitaders.

 Sper ils stans, nua che la glieud po cumprar products e servetschs, datti era ina gastronomia ed in program cun activitads ora en il liber, sco per exempel chavaltgar sin ponis ubain era raiver sin harassa, far circus ni scuvrir autos da pumpiers vairs e sprizzar cun l'uder da pumpiers.

Ils geniturs pon tadlar trais referats: in d'ina pedagoga sociala, in davart il purtar pops e tschel tracta cun tema psicologic. Las visitadras ed ils visitaders laschan plaschair.

D'ina vart porscha il martgà divertiment per ils uffants, e da l'autra vart datti stans da cumpra e cussegliaziun per geniturs. Savens ves'ins geniturs cun novnaschids che van cun charrin da pops tras las hallas. Autras famiglias tutgan gia tar la clientella da tschep.

Impressiuns dal martgà per famiglias