A l'act festiv èn stads preschents il president communal dad Ilanz/Glion, Marcus Beer, la cussegliera guvernativa Carmelia Maissen, sco er il president dal cussegl administrativ da la Viafier Retica, Mario Cavigelli ed il directur Renato Fasciati.
Previs èsi da terminar las lavurs vi dal plaz per autos da posta ed il parcadi l'atun 2024 ed alura spazzar il bajetg existent da la staziun. Il proxim pass è lura da far in nov bajetg cun ina garascha sutterrana. Quel duai cumpigliar fatschentas, abitaziuns ed in center da scolaziun. Sco davos pass vegn il plaz da la staziun furmà da nov sco spazi da sentupada e per occurenzas.
Gia il 2019 èn las lavurs da sanaziun vi dals binaris stads a fin. Quels correspundan dapi lura a la lescha per impedì.
VR Immobilias SA è purtadra dal project
Ils patruns dals bajetgs èn la vischnanca da Glion – ch'è responsabla per la nova plazza d'autos da posta ed il parcadi, sco era per il nov plaz da la staziun – e la VR Immobilias SA, responsabla per il nov bajetg da la staziun. La VR Immobilias SA tutga cumplainamain a la Viafier Retica e fa fatschenta sin agen quint. Il punct central da l'interpresa è da sviluppar vinavant areals da staziun ch'èn centrals en ils vitgs. Quels duain daventar centers attractivs da servetsch.
Il project a Glion è l'emprim project pli grond che vegn realisà entras l'interpresa. La summa totala dad investiziuns munta qua a radund 40 milliuns francs, da quels surpiglia la VR Imobilias SA 30 milliuns. Ulteriurs sumegliants projects èn en realisaziun (p. ex. Domat/Ems) u dain succeder, p. ex. a la staziun da Landquart, Claustra, Puntraschigna, Scuol e Schiers.