La fundaziun «Tür auf – mo vinavon» è ils ultims 33 onns s’engaschada surtut per la lavur da giuventetgna. Uschia ha ella lantschà la giuventetgna Cadi, ch’ha oz trais locals d’entupada e ch’organisescha lieus nua che la giuventetgna po s’inscuntrar a moda controllada. Era vegnan giuvenils scolads sco manaders dal local e pon uschia surpigliar responsabladad per lur local, uschia è vegnì orientà al cumenzament da las festivitads da 33 onns. Part da la lavur da giuventetgna fan era regularas audienzas nua ch’ils giuvenils pon discussiunar ma era survegnir cussegl. Ils contracts cun las vischnancas valan il mument, ma impurtant saja da sensibilisar las vischnancas che la lavur da giuventetgna saja ina impurtanta chaussa, declera il manader da la fundaziun Christoph Zingg.
Canorta Lumpazi è vegnida lantschada da la fundaziun
La canorta Lumpazi è vegnida lantschada da la fundaziun avant uss dapli che diesch onns e la canorta è in success. Uschia datti il mument ina glista da spetga e surtut la mancanza da persunal è la gronda sfida, declera Christoph Zingg, ch’ha surpiglià il post da plevon da la plaiv refurmada Cadi avant radund dus onns. La purschida da la canorta saja fitg tschertgada e perquai basegnan els surtut persunas scoladas. La scolaziun d’emprendistas ed emprendists funcziunia fitg bain, ma che quellas restian era suenter a Mustér, gliez na possian ins betg influenzar, uschia Christoph Zingg.
La basa da la fundaziun èn ils inscunters
Ina tala festa da giubileum saja impurtanta per vegnir ensemen e s’inscuntrar ed uschia naschian ideas e projects, di il plevon. Era per vegnir tar las finanzas necessarias, pertge il mument na scrivian els betg gudogns e quai saja ina da las sfidas per l’avegnir da vegnir da finanziar tut era en vista a novs projects ma surtut en vista als projects etablids e giavischads en vischnanca, declera Christoph Zingg.