Freestyle Academy a Laax - Sfugar sin 2'000 meters quadrats

Dus onns han las lavurs da construcziun durà. Suenter che la Freestyle Academy a Laax ha puspè avert sias portas la stad 2024, hai uss dà ina festa d'inauguraziun en grond stil. Sportistas e sportists da num e da pum en stads da la partida per festivar il lieu, nua che chambroclas ed adrenalin tutgan tar il bun tun.

L'indriz ch'exista dapi il december 2010 è s'etablì sco lieu impurtant per sportistas e sportists che vulan emprender e perfecziunar ils trics en in ambient segir. Era Andri Ragettli trenescha tranter auter là ses trics legendars. La veglia halla da tennis dals onns '70 è vegnida spazzada il 2022 per far plazza a la nova academia ch'è uss pli gronda e pli moderna e che cuvra ina gronda quantitad da disciplinas da sport. La nova academia è vegnida bajegiada a moda persistenta, uschia han ins duvrà bler material da construcziun or da la halla veglia.

Dapli purschidas e dapli spazi

Cun ina surfatscha da 2000 meters quadrats è la nova Freestyle Academy cleramain pli gronda ch'il bajetg precedent. Ma be cun grondezza n’èsi betg adina fatg, ils responsabels han laschà inspirar ed han discutà cun ils coachs da freestyle, cun atlets naziunals ed internaziunals sco er cun observar trends actuals. Quai sa mussa tar la purschida. Il focus spezial vegn mess sin il skating. Miniramp, skatebowl, street skate sco era ina zona da skate planiva – quai po esser in pitschen siemi per tuttas e tuts cun passiun per il skateboard.

Zonas innovativas per trampolins e per in percurs

La zona da percurs è medemamain vegnida engrondida per porscher dapli sfidas e pussaivladads da trenament, tranter auter cun ina tur da sigl ed in airbag. Per trenar trics da freestyle porscha la «plazza da gieus» in zic pli speziala era ina detga schelta da trampolins. Il highlight: in trampolin cun in sistem da camera per analisar ils sigls sin videos da 360 grads.

In local per in e scadin cun in cor per Freestyle

La Freestyle Academy vul oravant tut promover il sport da massa e porscher ina purschida per uffants, giuvenils, famiglias e creschids. Cun il motto «Freestyle è per tuts» vegn creada ina communitad inclusiva che pledenta tant sportists d’amaturs sco er sportists professiunals. Uschia duai quai esser in lieu che porscha trenaments professiunals per las atletas ed ils atlets dal futur.