Las lingias d’aua dals indriz da far naiv èn gia fatgas. La pendenza constat e l’aua cula gia. Sulet ina turbina sto vegnir montada ed alura possian ins producir energia. Ils indriz da far naiv sajan en acziun sulet in minimal temp da l’onn e las lingias pateschian donns, sch’ellas na vegnian betg duvradas regularmain. Cun producir energia possian ins uschia nizzegiar dubel questa infrastructura existenta, e gist schanegiar las lingias, declera il promotur regiunal da la Surselva Ruedi Büchi. Il mument saja dentant la Confederaziun vida reglar il pretsch d’energia che vegn pajà, e quai saja la finala il punct decisiv: Quant che l'investider survegn.
Grond potenzial era per cooperaziuns d’aua e sistems d’aua persa
Per Ruedi Büchi è la situaziun clera: Las regiuns periferas na possian betg contribuir grond a la strategia d’energia 2050. Ma cun pliras ovras pitschnas possian ins producir almain ina part da l’energia che svaneschia senza las ovras nuclearas. E questa cumpart possian talas ovras decentralas cun infrastructura existenta contribuir, di Ruedi Büchi ch’è era mainaproject da la regiun d’energia Surselva.