Motivar uffants da sa muventar e sautar tenor musica moderna – quai è stà la finamira dad Esther Hendry ed Graziella Di Bella cura ch’ellas han fundà l’onn 2000 la gruppa Movis. 15 onns pli tard fan 130 uffants e creschids part a las differentas gruppas dals Movis. Sco Esther Hendry di han ins ponderà insatge spezial per il giubileum, numnadamain sautar tenor musica rumantscha. Tranter auter vegn era sautà la chanzun da Gion Balzer Casanova “La sera sper il lag”.
Il cumponist Gion Balzer Casanova n’ha betg propi pudì s’imaginar co ch’ins po sautar sia cumposiziun. Suenter avair vis in per giadas la choreografia durant l’emprova ha el manegià: «Jau sun intgantà tuttenina ed jau pos ussa m’imaginar che cun il purtret da tribuna, la vestgadira, la glisch ed tut dat quai ina bella chaussa».