L'aura bletscha da questa stad procura per in retard en la racolta da fain. Ils purs e las puras ston nizzegiar ils paucs dis da bell'aura per dumagnar sut tetg uschè bler fain sco pussaivel.
Visita a Surrein
Robert e Myriam Pelican mainan a Surrein in manaschi da vatgas-mamma. Enfin uss han els fanà ils prads en la planira. Per Surrein ha l'aura bletscha era avantatgs:
Il plaun da Surrein è in terren da sablun e glera. Qua avain nus savens problems pervia da la setgira. Cun questa blera plievgia datti dentant ina massa bun pavel.
Ussa vai dentant en las plauncas. Ina sfida cun il terren bletsch. Las maschinas gidan dentant dad era cultivar grondas surfatschas en las spundas.
Pausa sfurzada
Durant il segar en la costa stippa hai dà in defect tar il motor da segar. Quel è ussa tar il mecanist dal vitg.
Il squitsch vegn bain pli gronds sch'ina maschina rumpa. Cunzunt cura ch'i dat uschè paucs dis da bell'aura. Per cletg è il mecanist gist davant chasa.
Il mecanist «Leci da motors» Leci Deplazes senta era ils dis da sulegl. Quels dis organisescha el uschia ch'igl è pussaivel da reagir a la svelta.
Ins senta bain, ch'ils purs èn sut squitsch. Pervia da quai na datti dentant betg dapli defects tar las maschinas.
Suenter la curta pausa sfurzada vai per Robert Pelican enavos sin la costa stippa per dumagnar il fain a val.
Mecanisaziun sa mida
Vegniva ina gronda part da las lavurs fatga pli baud cun fautsch, furtga e rastè datti ozendi per praticamain tut ina maschina u in apparat. Oz en quai il «Trimmer», il ventilatur da fain ed il «Twister». In apparat che vegn montà vi dal motor da segar e che vegn da muventar enormas quantitads da fain.
Era en las plauncas ston ins vegnir da cultivar il funs effectivamain. Senza quellas maschinas na vegnissan da quels funs sco qua pli probabel betg pli segads.
Lavur da cuminanza
Per spargnar maschinas ed uschia chapital, lavuran ils purs da Surrein savens communabel. Uschia na sto betg mintgin avair tut las maschinas.
Ils purs da Surrein sa gidan bain in cun l'auter. Sche jau dovrel agid, alura survegn jau quel entaifer curt temp. Quella situaziun dat alura era la pussaivladad da discurrer in cun l'auter.
Or da l'archiv:
