Falera - Dapli spazi d'abitar per indigens – dentant co far?

Cun 80% abitaziuns secundaras e la zona da bajegiar che sto vegnir pli pitschna, stat la vischnanca da Falera avant il problem: Co duai ella far pussaivel era en l'avegnir ad indigens da vegnir en vischnanca ad abitar. Perquai ha la vischnanca surdà a l'architect da Vrin Gion Caminada l'incumbensa da sviluppar scenaris e da mussar si, tge pussaivladads ch'i dat per nizzegiar set parcellas en la zona da bajegiar. Questas parcellas èn en possess u da la vischnanca politica, da la vischnanca burgaisa u da la plaiv.

Projects da realisabel enfin visiunari

En ina lavur da semester han students e studentas da la Scola politecnica federala da Turitg (ETH) elavurà variantas che cuntanschan in nivel davent da realisabel enfin fitg visiunari.

Sco Gion Caminada ha ditg ad RTR, n'ha la realisaziun da singuls projects nagina prioritad. Per Gion Caminada ston ils da Falera l'emprim definir tge ch’els vulan cuntanscher cun las surbajegiadas – avant ch'i fa senn da cumenzar a planisar projects sin las set parcellas.

Lavurs da semester da students da la Scola politecnica federala