La sonda passada è David Casutt stà a sia 15avla demonstraziun cunter las mesiras da corona, quella giada a Cuira. Per emna investescha el tranter tschintg e 10 uras per s’engaschar cunter la lescha da Covid-19. Sia motivaziun per unfrir il temp liber saja la suandanta:
Jau vi puspè turnar a la vita normala avant Covid.
L’um da Falera gida per part d'organisar las demonstaziuns. Cunzunt activ è el dentant en las raits socialas. Per exempel ha el fatg ina gruppa rumantscha sin Facebook, u fa il posten videos e fotografias davart la lescha da Covid-19 e las mesiras da la Confederaziun. Saja quai videos da persunas ch'èn cunter las mesiras u commentaris da persunas ch'èn per la lescha da Covid-19.
Ir enturn cun las reacziuns
Sch'ins s'exprima en las medias socialas, ston ins quintar cun reacziuns. Sajan quai likes u dislikes, commentaris positivs sco era negativs. L’um da 40 onns, che lavura sco scolast, ha survegnì bleras reacziuns positivas – cunzunt en la gruppa da Facebook.
Tuttina ha in u l’auter scrit a mai persunal. Ma là avain nus la fin finala puspè chattà la pasch.
Sin Twitter haja dà dapli reacziuns negativas, di David Casutt. Sin Twitter è era sia scheffa, la manadra da scola, vegnida tratga viaden e marcada.
Per regla vegnan ins mess en il chantun «dretg extrem». Quai na sun jau dentant betg; Jau sun tranter sanester ed il center.
Pia, David Casutt survegn reacziuns positivas sco er negativas en las raits socialas. In commentari negativ ha dentant savens dapli paisa che 10 commentaris positivs. Ma l’um ch’abitescha a Turitg possia ir enturn bain cun las reacziuns online. Sin via n'haja el anc mai survegnì reacziuns pervia da ses engaschi.
Porscher in lieu da sentupada
La finala s’engaschia el era per porscher ina plattafurma, nua che persunas cun las medemas oppiniuns possian s’entupar, passentar temp ensemen e discussiunar. Da savair ch'i dettia anc auters che han la medema opiniun, senza che mintgina e mintgin sto s'exponer publicamain, saja impurtant, di David Casutt.