La «Fundaziun Center da perscrutaziun d’energia alpin» organisescha mintg’onn ils discurs davart la perscrutaziun d’energia. A la discussiun publica da quest onn èn stads envidads cusseglier guvernativ Mario Cavigielli, Andreas Züllig da HotellerieSuisse, sco era Christian Capaul – mainafatschenta da la «Rhiienergie». E l’interpresa d’electricitad ha gia fatg ponderaziuns co producir en futur idrogen.
Ovra fotovoltaica betg ideala
Sco emprim hajan ins ponderà da producir cun la nova ovra fotovoltaica a Favugn era idrogen. Ma il mument na rendia uschia ina producziun betg, di Christian Capaul. D’ina vart saja l'energia solara memia chara en la producziun ed era la producziun constanta na saja cun electricitad solara anc betg dada. Ma en in pèr onns pudess quai tuttavia era render, di Capaul. Il mument sajan els dentant vid in project cun forza idraulica.
Lubientscha da construcziun gia sin maisa
Uschia sajan ins vida planisar cun l’ovra idraulica a Reichenau / La Punt da producir idrogen. La lubientscha da construcziun saja gia sin maisa, ma l’interpresa n’haja anc betg decis da construir quest lieu da producziun. In dals criteris principals saja la rentabilitad, di Christian Capaul. Il potenzial saja senza auter avant maun. Uschia saja impurtant da producir l’idrogen nua ch’el vegn duvrà. Quai surtut perquai che ils sistems d’arcunar idrogen en gronds quantums n’èn anc betg avant maun.
Maschinas da pista dal futur van cun idrogen
In grond potenzial vesa Christian Capaul en las maschinas da pista. Uschia dettia uss in prototip che vegnia preschentà quest onn. L’avantatg saja che idrogen saja en connex cun las emissiuns da gas natiral anc pli d’avantatg e la producziun dad idrogen possia era succeder decentral tras ina ovra electrica pli pitschna. Surtut sche las pussaivladads d'arcunar vegnian en futur pli bunas e bunmartgadas.
