La «confidenza en la prestaziun da lavur» n’è betg pli avant maun. Uschia argumentescha ina patruna ses pass da relaschar ina collavuratura per immediat. Tenor Roger Rudolph, il professur per dretg da lavur a l’Universitad da Turitg, sto ina patruna da lavur inditgar ils motivs per ina disditga a scrit be sche la persuna relaschada pretenda quai. I n’exista nagin obligatori explicit d’infurmar. Sche la collavuratura dumonda dentant quella infurmaziun, sto la patruna far quai detaglià avunda, uschia Roger Rudolph.
Pauschalas sco «nagina confidenza» na taschian betg. Quant exact ch’ina patruna da lavur haja da far quai n’è betg scrit en la lescha. I saja dentant inditgà che quai sto vegnir fatg en furma enumerativa. L’idea è che la persuna relaschada vegn a savair sche sia disditga saja stada arbitrara u betg.
Includer la publicitad
Ed en il cas che l’emploià relaschà mussa sia malcuntentientscha ed infurmescha las medias? Sia patruna da lavur n'avess betg pudì far quai ord motivs da la protecziun da datas. In emploiader dastga defender sia posiziun be precautamain, reproschas cunter l'emploià na dastgan betg vegnir communitgadas publicamain.
Ina precauta explicaziun da reproschas nungistas sto esser pussaivla.
Scumond d'areal
In scumond d’entrar sin l’areal da l’anteriura patruna saja insatge nunusità. Normalmain na pronunzia in emploiader betg uschè in scumond. Quai dettia il sentiment ch’insatge na saja betg stà correct, ch’igl haja dà in surpassament. Roger Rudolph di ch’en ils blers cas na saja in scumond betg adequat. Mintga patruna da lavura haja dentant il dretg da scumandar l'access sin ses areal a mintgin e mintgina.
Roger Rudolph accentuescha ch’ils dretgs e las obligaziuns che naschan or dal contract èn liants per tut las partidas enfin il davos di ch’il contract è valaivel.
