Devoziun per animals - La baselgia da Glion ha avert sias portas era per animals

Ils 4 d’october è il di internaziunal da la protecziun d’animals. Quai è er il di da la mort da sogn Francestg d’Assisi. Lez vala anc adina sco il patrun da protecziun dals animals e cumbatteva gia en il 12avel tschientaner per las valurs dals animals. E questas valurs amicablas ha la baselgia catolica da Glion, Schluein, Sagogn e Sevgein vulì celebrar cun ina devoziun da benedicziun.

Impressiuns

Radund 20 persunas, 8 chauns e 3 mieurs han fatg part a la devoziun a Glion. Las reacziuns da las visitadras e dals visitaders én stadas fitg positivas, malgrà ch’ins haja gì l’entschatta in zic retegnientscha d’entrar la baselgia cun in animal.

Armin Cavelti, scolast da religiun e Flurina Cavegn, collavuratura pastorala, han organisà questa devoziun speziala. Era per els era quai in tschert experiment, sco Armin Cavelti declera. El haja gì quella idea gia avant in temp, ma ella fiss bunamain ida en emblidanza. Per schabetg haja el cattà in artitgel da son Francestg e lura èsi puspè vegnì endament ad el.

Durant la devoziun vegni chantà, raquintà e preschentà – ed ils animals èn tut ruassaivels. Il punct culminant è lura la benedicziun nua che las possessuras e lur animal pon vegnir avant l’altar. Là dattan lura Armin Cavelti e Flurina Cavegn lur benedicziun cun l’aua benedida. Inqual chaun scurlatta. Suenter ina mes’ura è lura la part uffiziala a fin e la plaiv envida anc ad in pitschen apero en curtin. Era in da bun per ils chauns è organisà. L’atmosfera è stada fitg empernaivla ed ils organisaturs train er ina bilantscha positiva. Per ellas ed els è cler: I vegn a dar ina cuntinuaziun.