Davent da mardi ils 22 da december ston ils implants da skis dal chantun Uri serrar. En il territori da skis Andermatt Sedrun sa mussa uschia ina situaziun extraordinaria. Sedrun n'è betg pertutgà da questa decisiun, sco Silvio Schmid da la direcziun da las pendicularas Andermatt Sedrun ha deig ad RTR.
Dus chantuns, dus reglaments
Schmid ha fatg attent ch'il territori che tanscha sur cunfins, haja gia fatg questa experientscha – cura ch’il chantun Grischun haja serrà las ustarias. Uschia èn las ustarias grischunas anc adina serradas, da la vart da l'Uri èn quellas dentant l'entir temp avertas.
Grischun decida ils 21 da december
Per las pendicularas grischunas vegn la regenza grischuna a decider glindesdi proxim, e quai tenor il criteris e la cifras che la Confederaziun ed il chantun Grischun han tschentà.
La vart da l'Uri resta serrada fin ils 29 da december. Sco quai ch’il chantun Uri scriva, saja quai per evitar accidents sin las pistas che pudessan uschiglio surchargiar ils ospitals. Uri suonda uschia als chantuns da la Svizra Centrala, ch'avevan gia decidì da tegnair serrà lur territoris da skis sur Nadal.