La nova cunvegna da prestaziun tranter la vischnanca da Glion e la Spitex Foppa è dapi la davosa sesida dal parlament communal da Glion sut tetg. Ed igl è clera chaussa: Sco vischnanca purtadra duain ils responsabels communals da Glion pretender tschertas respostas ed era midadas – sche quai fa meglier il sistem.
Mo suenter che la discharmonia è passada pon ins dir, ch'il tun fa la musica. La suprastanza da Glion e tut davanttiers il president communal Marcus Beer, ha manà in cumbat uschè fervent ch'ins pudess patratgar ch'i sa tractia d'in cumbat persunal. Visar la cunvegn da prestaziun è stà in signal fitg stinà per schliar il problem. Ed il vocabulari cun expressiuns sco «sfarlattar daners» tar «tarladir la lavur» – ha laschà enavos in maletg maltgiert.
Na fissi betg ì da sa far udir sin ina moda e maniera pli respectusa? Betg da chapir fallà. Per ils interess èsi da cumbatter, ma jau manegel ch'ins vegnia era da manar las pli diras tractativas e cuntanscher sias finamiras cun pli pauca canera.
Igl è era da sa dumandar tge effect ch'ils tuns fauss han sin la glieud che s'engascha en ils gremis politics, en uniuns ed en auters uffizis. I n'è betg surprendent ch'i dat adina pli pauca glieud che vul surpigliar la responsabladad – ed uschia esser exponida. La finala dovri magari in zic dissonanza, ma quella na duai betg far empaglia l'entira chanzun.