Tar sanaziuns da chasas veglias preferescha Maurus Cathomas, che planisescha renovaziuns, la pussaivladad da colliar las chasas cun chalira a distanza. Quai lubeschia da mantegnair ils sistems vegls da stgaudar en quellas chasas sco sistems secundars. Ina pigna da scalegl daventia uschia in sistem supplementar ed i na dovria betg tanta laina. Stgaudar cun laina saja daventà pli pauc attractiv pervi da la lavur cun la laina e pervi da las prescripziuns da pulvra fina che quellas pignas ston ademplir.
Il stgaudament è il cor da la chasa, sche la chasa è chauda sa senta l’uman bain.
Tut ils sistems alternativs da stgaudar èn ad interim renconuschids, chalira da la terra, chalira da l'aria, sistems solar voltaics e termics, pellets u era la chalira a distanza. Sco quai che Maurus Cathomas di, na datti betg il sistem per chasas veglias. I dettia mo per mintga chasa la meglra schliaziun. Quella saja dad eruir, di Cathomas che sanescha gia dapi blers onns chasas veglias.
