«Clubbing» en il Coop a Glion - Sautar, baterlar e star da cumpagnia empè da far cumissiuns

La davosa giada ch'ins ha pudì far festa en il corridor davant la stizun dal Coop è stà il zercladur 2019 – pia avant radund tschintg onns. Auter che ussa dastgavan lura be persunas davent da 21 onns esser da la partida. L'onn suenter ha lura corona dominà il mintgadi ed uschia han ils organisaturs stuì desister da la festa. Ussa saja dentant il dretg mument per empruvar anc ina giada, di Severin Alig ch'è in dals organisaturs.

Avant corona organisavan l'um da 45 onns e ses collega Roman Vinzens, che maina tranter auter er in'ustaria a Glion, enfin quatter festas per onn. Quest onn èn duas festas planisadas – la proxima lura il november. Laschà inspirar han els da las festas ch'i deva a Cuira en il center da cumpra City West. Sinaquai han els creà il concept per il center da cumpra a Glion.

En il corridor tranter il Coop, la fatschenta da mobiglias Jysk e l'ustaria Shaka èn duas bars bajegiadas si. Enturn è spazi per baterlar e sautar. Ch'ins sa chatta en in center da cumpra na sentan ins strusch. Dretg e sanester cuvran tailas nairas las entradas da las fatschentas, igl è stgir e las cazzolas da colur procuran per tempra da club.

Giuven e vegl collavuran

Enfin ussa lavuravan persunas privatas per la festa, quest onn surpiglia l'uniun da giuventetgna da Luven ina gronda part. Persuenter survegn ella ina summa per la cassa d'uniun. L'organisaziun saja stada repartida bain e mintgin haja fatg quai ch'el haja savì il meglier, di il president da la giuventetgna Abel Vinzens. Els hajan per exempel surpiglià la part da reclama. Pia da far ils placats ed era la lavur sin las medias socialas.