En la vegliadetgna da 79 onns è mort pader Urban Affentranger da la claustra da Mustér. El saja spartì l’emprima dumengia d’Advent en l’ospital a Glion, communitgescha la claustra.
Oriundamain in Lucernais
Sco Alex Affentranger è pader Urban naschì ils 18 da mars 1944 datiers da Hitzkirch en il chantun Lucerna. Davent da l’onn 1957 ha el visità la scola claustrala a Mustér, ed il 1964 ha el absolvì la matura.
Suenter avair fatg il profess simpel, ha frater Urban studegià fin il 1975 a Salzburg en l’Austria. Dasper teologia era filosofia ed istorgia, e vitiers al Mozarteum musica da baselgia. Entant daventà pader Urban, ha el lura dà scola en claustra e gì ulteriuras funcziuns sco per exempel prefect e rectur. E vid l’orgla saja el stà in maister da l’improvisaziun, scriva la claustra da Mustér en sia communicaziun.
Ils davos onns han divers mals mudregià pader Urban. Perquai ha el stuì ir pliras giadas en l’ospital e laschar far operaziuns. Tuttina saja el adina puspè sa mess vid sia orgla charezzada.
Telesguard dal 2008: La claustra da Mustér porscha ina dimora d'ina emna
