Ciclissem da muntogna - Camp da mountainbike beneventa generaziun giuvna
La fin d'emna prolungada d'Anzainzas èsi normalmain fitg ruassaivel sin l'areal da scola a Glion. Enfin glindesdi èn las portas da la scola serradas. Quest onn è quai dentant in zic auter. Radund 20 uffants sa participeschan ad in camp da mountainbike sin l'areal da scola.
Quatter dis, da gievgia enfin dumengia, è il plaz cotschen ed il guaud sper la chasa da scola fermamain en ils mauns da la proxima generaziun da ciclistas e ciclists da muntogna. L'organisatura MS Sport porscha in curs per uffants tranter 6 e 15 onns. Ils 20 uffants emprendan da scolasts da mountainbike professiunals tut – da la savida da basa enfin ir da stgalas e sur obstachels, e tut tenor nivel er da manischar il velo da muntogna sin sendas pli pretensiusas en il guaud.
camp da velo da muntogna a Glion
Las manadras ed ils manaders dal curs repartan ils uffants en gruppas tenor capacitad e vegliadetgna. Alura datti exercizis sco far stortas cun resguardar la posiziun da la pedala – u ch'ils uffants han d'emprender la tecnica correcta da franar. La dumengia ch'è il davos di dal camp, datti lura in spetachel. Là pon ils uffants ir sur schanzas e surmuntar obstachels cun lur velos, ed uschia mussar a lur geniturs tge ch'els han emprendì durant quels quatter dis plain activitads.