Dapi ils 13 d’avust han persunas da 12 onns e passa pudì ir en il center da virolar a Glion. Questa purschida è vegnida organisada ina giada l’emna, e la proxima chaschun è ils 18 da settember da las 11:00 fin las 14:00.
Surtut giuvnas e giuvens nizzegian uss la chaschun da laschar dar l’emprima virola. Il motiv principal: avair tschertas libertads sco ir en l’ustaria ubain en vacanzas. Ma blers han resalvas e dubis:
Jau hai studegià ditg, dess jau, na dess jau betg. Quai è stà spontan, jau sun sesì en l’auto e vegnì qua.
Jau vess forsa anc spetgà in mument e s’infurmà in zic.
Jau pens schon ch’igl è in tschert squitsch. Cler, ins na sto betg ir en l’ustaria u en vacanzas, ma quai s’auda era tar la vita.
In grond success
Il medi Hans Jacomet, che ha lavurà en il center da virolar, di che quai saja stà fin uss in grond success. La glieud vegnia plitost a laschar virolar, sch’els possian vegnir senza s’annunziar e na stoppian betg far quai al computer. Ed el ha constatà che surtut la giuventetgna vegnia pli e pli stedi.