Campiunadi mundial OL Flem - Blera glieud e bell’aura – il facit dal comité d’organisaziun

Ils campiunadis mundials da cursas d’orientaziun èn idas a fin questa fin d’emna a Flem. La presidenta dal comité d’organisaziun Brigitte Grüniger Huber è cuntenta cun ils dis passads. Surtut l’aura da la fin d’emna ma era ils resultats legraivels da las atletas ed ils atlets svizzers hajan procurà per ina gronda festa a Flem. Sulet la dumengia sajan dapli che 5’000 persunas vegnidas a Prau la Selva da Flem per far festa cun las curridras ed ils curriders. Il dumber giavischà sur tut ils dis da 18’000 persunas n’hajan ins dentant betg cuntanschì dal tut di la presidenta. Ma il mument possian ins propi betg dir in punct che na saja betg gartegià sur quels dis, di Brigitte Grüniger Huber cun in rir sin fatscha.

Per la regiun porta quai pernottaziuns e reclama

Per ina regiun sco Flem Laax Falera portia l’entir campiunadi mundial dapli che 50’000 pernottaziuns. Quai saja in grond factur economic per ina regiun e lura vegnia anc vitiers tut ils maletgs da la regiun che hajan chattà la via or en l’entir mund da bellezza aura. Quai saja reclama gratuita per ina regiun, di Brigitte Grüniger Huber. Per il sport da cursas d’orientaziuns saja ina tala occurrenza gronda era adina ina pussaivladad da sa mussar ad in pli grond public ed uschia era forsa chattar novas persunas che vulan far quai sport e la finala porschia gist il Grischun pussaivladads quasi infinitas per cursas d’orientaziun, uschia la presidenta dal comité d’organisaziun.