Sandro Tomaschett è scolast primar ed el ha organisà l'emprim barat quadriling naziunal a Mustér. Quai ha el fatg sin iniziativa da Martin Candinas e la Lia Rumantscha. Radund 70 scolaras e scolars da la 5avla classa han passentà quell'emna da barat linguistic il matg passà en il Center da sport e cultura a Mustér. Ina classa d'Appenzell, ina d'Aquarossa ed ina da Cressier han visità la 5avla classa da Mustér.
Il scolast ch'instruescha a Mustér ha preschentà ad autras persunas d'instrucziun las experientschas ch'el ha fatg tar quest barat linguistic. Plinavant ha el infurmà, tge ch'i dovria per organisar uschè in eveniment cun l'atgna classa e nua ch'ins possia s'annunziar sche scolastas e scolasts e lur classas èn interessads vi dad uschè in barat. Sper bler engaschi cun uras da lavur supplementaras, datti bler d'organisar e differents pass administrativs, sco per exempel d'inoltrar dumondas da sustegn tar il chantun e tar l'agentura da barat e mobilitad svizra «Movetia», u sesidas da preparaziuns cun las persunas responsablas da tschellas linguas.
L'emprim barat quadriling è stà in success
Sandro Tomaschett guarda enavos sin in'experientscha positiva per el e sia classa. D'ina vart hajan ins pudì entrar en contact cun persunas or d'in auter territori linguistic da la Svizra, da tschella vart hajan las scolaras ed ils scolars survegnì in sensori per autras sco er per l'atgna lingua. Uschè in barat linguistic n'haja betg l'intent ch'ils uffants emprendan auters linguatgs da moda e maniera perfetga.
Il pli impurtant è ch'ils uffants han vis la valur dal rumantsch.
E suenter il barat quadriling dal matg passà, existan ils contacts anc adina? Per part gea, uschia Sandro Tomaschett. Las ed ils da Mustér sa scuntran cun la classa da la Svizra franzosa, e quai durant plirs dis en la Svizra centrala.
Tenor la Lia Rumantscha na saja in barat quadriling anc betg planisà per l'onn proxim. Il giavisch fiss qua, da puspè pudair far uschè in barat. I dovria dentant scolas, scolastas e scolasts e classas or da tut ils territoris linguistics da la Svizra che vulan sa participar e blera organisaziun.