Assicuranzas - Fatg la segirada da pandemia ord precauziun
En la branscha da restauraziun n'èsi betg derasà da far ina segirada da pandemia. «Jau hai gì in bun cussegliader», di Andrea Guareschi, ustier da Cuira.
Atgnamain haja el fatg ina segirada encunter epidemias, di Andrea Guareschi l'ustier dal restaurant Lacuna a Cuira. Lura haja il cussegliader da segiradas fatg attent el che questa segirada cumpiglia pandemias ed epidemias. Per el saja stà cler: «Geabain, quai fatsch jau.»
Sut pandemia chapeschan ins ina malsogna d'infecziun che sa derasa sin l'entir mund. La differenza tar in'epidemia è che lezza sa derasa mo regiunalmain u localmain.
Questa primavaira, cura che l'entir mund ha cumenzà a discurrer dal coronavirus, saja el s’interessà tar sia assicuranza, co quai saja ussa cun sia segirada. Ses agent haja pudì quietar el. Cura ch'il stadi ha cumandà il lockdown, saja l'assicuranza sezza s’annunziada tar el.
La Mobiliar
Avrir la boxSerrar la box
Ils ristgs da pandemia e d'epidemia èn stratgs ensemen en l'assicuranza da chaussas da la Mobiliar. Raschun è che l'assicuranza lavura be en Svizra ed il Principadi da Liechtenstein.
La Mobiliar ha fitg pauca clientella che ha fatg ina tala assicuranza. I sa tractia d'ina cifra sut 10% da las fatschentas che han fatg ina tala segirada.
Surtut fatschentas cun ristgs da contaminaziun entras scherms sco ustarias chascharias ed insumma elavuraziuns da latg han fatg talas segiradas.
La Mobiliar quinta en connex cun il coronavirus cun donns da var 400 milliuns.
La segirada d'epidemia sto vegnir valitada da nov, da quai èn tut las segiradas sin l'entir mund pertutgadas. Dapi ils 26 da favrer na san ins betg pli far ina tala segirada tar nus.
Fin ussa saja l'entira chaussa vegnida rugalada a moda culanta ed el haja gia survegnì l'emprim a conto da l'assicuranza.
Tge duai jau dir... jau sun in carstgaun ventiraivel e benedì, ed en quai cas qua hai era gì cletg.
