L'exposiziun Art Safiental s’extenda sur l'entira Val Stussavgia ed è da contemplar per la pli gronda part or en il liber. Ella è uschè voluminusa – respectiv ils differents objects èn uschè lunsch in or da l'auter – ch’ins na vegn betg da contemplar tut ils exponats en in di. Da vesair èn quels tranter Versomi, Tenna, Stussavgia plaz u Thalkirch.
Oriundamain vegniva simplamain exponì art en la natira, uss è vegnì vitiers art che sa fatschenta cun l'ambient. I va era per muventar ses agen corp atras la natira, ch’ins sto magari er ir sin in culm.
Perquai fai senn da trair en buns chalzers sch’ins vul admirar tut las ovras exponidas. En tut datti da vesair 11 ovras ch'èn installadas fix. La mesadad dals artists ch'exponan en la Val Stussavgia vegnan or da l'exteriur ed il tema da l'exposiziun è: «Tge fiss sche? Vuschs or da l'avegnir».
Quai è ina dumonda speculativa. Il mund è sa midà il davos temp. Perquai lain nus, cun agid dals expositurs, promover da far patratgs sur da l'avegnir e sur da sasez.
Cun auters pleds: tschentar en dumonda las normas enconuschentas. Quai è alura er il fil cotschen ch'è da vesair en ina furma u l’autra tar tut las ovras exponidas. Quellas pon ins contemplar enfin ils 20 d’october cun spassegiar tras la Val Stussavgia.
