Igi Zopp è il nov manader da fatschenta da l’Andermatt-Sedrun Sport SA. Il cussegl d’administraziun ha elegì el sco successur da Rainer Flaig. Quai communitgescha l’Andermatt Swiss Alps.
Manar 230 collavuraturas e collavuraturs
Igi Zopp ha 54 onns ed è dad Andermatt. Il mument maina el l’Uffizi per la protecziun da la populaziun e militar dal chantun Uri ed el è schef dal stab directiv chantunal. Zopp ha in diplom sco informaticher ed è uffizier tar l’Armada svizra.
Sco schef da l’Andermatt-Sedrun Sport SA ha el da manar 230 collavuraturas e collavuraturs, planisar projects strategics d’investiziun ed è responsabel per la collavuraziun regiunala cun Tujetsch e Mustér.
El cumenza ses nov uffizi il prim da schaner 2022.
