Il Grischun è tenor budget – anc – en ina situaziun finanziala solida, il minister da finanzas Christian Rathgeb quinta cun in deficit da 10,4 milliuns francs tar in tegnairchasa da radund 2,8 milliardas. Perquai han las deputadas ed ils deputads dal Cussegl grond er approvà il budget senza trair il rispli cotschen.
Dapli discussiun ha dentant la prognosa per ils budgets futurs dà. Per il futur èn nivels stgirs da vesair. Il Grischun sto quintar cun pli paucas entradas. Per l'ina na sa el betg quants daners che vegnan da la Banca naziunala svizra, per l'autra dat quai er pli paucs daners da la gulivaziun da finanzas da la Confederaziun. Plus: I n'è betg cler tge influenza che la guerra da l'Ucraina ha per exempel sin pretschs d'energia ubain sin la chareschia.
Il budget: Insaquantas entradas
Las entradas da taglia creschan: L'onn proxim fa il chantun quint cun dapli entradas da taglia sin il gudogn tras vender immobiglias.
Tge che vegn dentant probablamain a mancar tar las entradas, èn sco gia menziunà ils radund 61 milliuns francs budgetads che arrivan da la Banca naziunala svizra. «Sche quels daners mancan fa quai mal, dentant na bitta quai tar in tegnairchasa da 2,7 milliardas betg tut sin il chau», aveva il minister da finanzas Christian Rathgeb ditg, cur ch’el ha preschentà il budget a las medias.
Il budget: Insaquantas expensas
En connex cun la guerra en l’Ucraina quinta il chantun cun expensas da radund 63 milliuns francs per sustegnair radund 3'500 fugitivas e fugitivs cun protecziun, tgira ed alloschament. La gronda part da quels custs surpiglia dentant la Confederaziun.
Il chantun investescha il proxim onn 451,2 milliuns francs. Gronds projects èn cunzunt il campus da la Scol’auta spezialisada a Cuira, la renovaziun dal center da dietas dal Plantahof, la construcziun d’in nov bajetg da l’Uffizi da traffic a Roveredo, ina nova clinica per il servetsch psichiatric d'uffants e giuvenils ubain la sanaziun dal bajetg per la nova Dretgira superiura a Cuira.
Igl è il davos budget per il cusseglier guvernativ Christian Rathgeb che terminescha pervi da la limitaziun da temp ses uffizi sco minister da finanzas la fin da l’onn. Suenter surpiglia Martin Bühler la cassa dal chantun.
