La mancanza da medicaments saja ina chaussa in pau stentusa, di Monika Fehr da la Steinbockapotheke a Cuira. Ella pretenda ch'ella na possia betg servir mintga terz client u clienta uschia u dar ils medicaments uschia sco el u ella avess gugent quai.
Dapli sforz
Sch'in medicament na saja betg disponibel stoppian ins tschertgar alternativas sco per exempel in auter medicament cun il medem effect u confortar la clientella da spetgar pli ditg. Quai saja gia dapi pulit mument daventà vita da mintgadi en l'apoteca. I dovria simplamain bler dapli temp en la fatschenta quotidiana. La situaziun saja dischagreabla per las apotecas ed er per las clientas ed ils clients. Las reacziuns da la clientella sajan individualas, ils ins possian bain spetgar in mument fin ch'il medicament necessari saja puspè disponibel, per auters as stoppia immediatamain chattar ina schliaziun u in'alternativa.
Sfida actuala
Ina da las pli grondas sfidas da quest enviern sajan stads ils medicaments per uffants. En quel sectur haja dà gronda fadia da survegnir antibiotica u medicaments encunter dolurs en furma liquida. Qua hajan ins gì difficultads nua ch'ins haja immediatamain stuì avair ina schliaziun. Per exempel da dissolver ina tabletta encunter dolurs en l'aua, e l'uffant haja alura stuì baiver ina «broda» main gustusa.
Blers malsauns nunspetgads
Igl haja cun ina giada dà uschè blers malsauns che nagin haja propi pensà ordavant, che l'industria da farma saja effectiv stada surdumandada. Quest enviern haja suenter covid propi gì blers auters malsauns, blers grev malsauns che hajan duvrà antibiotica. Qua haja dà stretgas che nagin avess pensà ch'igl dettia quellas. Igl haja dà in basegn enorm.
Ussa saja l'enviern passà e cun la primavaira pensa Monika Fehr che la situaziun pudess sa quietar in zic. Ina fin da las stretgas tar ils medicaments na vesa ella actualmain dentant betg.
