Cuira Vest daventa in segund center da la chapitala. L'areal da mastergn ed industria d'oz sa sviluppa en il futur ad in center da viver e lavurar d'auta qualitad. En quest connex datti bler da coordinar. Perquai ha Stefan Brülhart cumenzà sco manager da territori. El è suttamess directamain a la regenza da la citad. RTR ha vulì savair tge ch'è ses job.
Dapi onns è Cuira vi da fullar via per promover il svilup en il vest da la citad. Tranter auter ha ella elavurà e concretisà in plan per Cuira Vest. Da maniera concreta duai dar in spazi d'abitar e da viver d'auta qualitad. En cifras duai cunzunt il dumber d'abitants ed abitantas crescher. Oz vivan 260 persunas sin il spazi da radund 16 hectaras u radund 23 plazzas da ballape a Cuira Vest. Il futur duain quai esser passa 4'000 persunas. Er il dumber da persunas che lavura a Cuira Vest duai crescher da 1'650 sin 2'200 persunas. Davos questas cifras sa zuppan differents projects, persunas e gruppas involvidas. L'incumbensa dal nov manager da territori Cuira Vest è da manar quests projects e da coordinar las differentas dumondas.
Stefan Brülhart na sto betg cumenzar a l'entschatta. La citad ha gia elavurà in masterplan per Cuira Vest ed il plan da l'areal. Quests documents da planisaziun furman la basa per il project da generaziun. «Uss suonda la fasa da realisaziun che cuzza 15 fin 20 onns,» declera il nov manager da territori en l'intervista cun RTR. I saja ina fasa cumplexa cun bleras persunas e gruppas involvidas e perquai dettia ses post, declera Brülhart vinavant.
Mia incumbensa è da manar tut ils projects urbans che pertutgan Cuira Vest e quai a moda integrala.
L'incumbensa dal manager da territori è cunquai er da coordinar las pli differentas dumondas che sa tschentan cun sviluppar ina nova part da la citad. El furma uschia in liom tranter l'administraziun communala, persunas u gruppas externas e la politica. Aifer la citad collavura Brülhart cunzunt cun ils servetschs da construcziun auta e bassa sco er cun l'administraziun d'immobiglias. En pli collavura el cun partenaris externs, sco per exempel cun investurs, proprietaris u organisaziuns culturalas u socialas.
Ina part dal job: far punts
Sustegnair il svilup a Cuira Vest munta en il mintgadi da Stefan Brülhart er da far punts tranter las differentas persunas interessadas. In exempel: D'in maun è in investur che vul fabritgar, ma na sa betg co duvrar l'immobiglia. Da l'auter maun tschertgan organisaziuns d'abitar, ina media u er ina scola spazi da prender a tschains. Il manager da territori po far qua la punt.
Masterplan Cuira Vest
Gia l'onn passà ha la citad preschentà il masterplan Cuira Vest. I sa tracta d’in manual da la citad per in project da pliras generaziuns. Sin bunamain 100 paginas è descrit co il svilup dal territori duai vesair or a Cuira Vest. Concret duai dar a Cuira Vest spazi per abitar, lavurar, furmaziun e temp liber, sco er spazi per diever commerzial.
Or da l’archiv: Il zercladur 2023 ha RTR rapportà tge ch’il masterplan prevesa:
Gia dapi passa 10 onns datti plans per Cuira Vest:
