La citad da Cuira porscha da nov in abunament general per tuttas purschidas da sport e da wellness da l'implant da sport Obere Au a Cuira. Er il bogn avert Sand e la patinera Quader èn cumpigliads en quest abunament. Il nov abunament datti a partir dals 3 da matg ed el remplazza las purschidas d'enfin uss cun excepziun d'abunaments d'uniuns.
Cun quest abunament vul il cussegl da la citad ademplir il giavisch da la populaziun d'avair tut inclusiv en ina purschida. I saja impurtant che la populaziun haja access svelt e simpel a las purschidas da sport e wellness a Cuira. L'abunament vegn plinavant er sustegnì finanzialmain da las cassas da malsauns supplementaras.
Il nov abunament cun num «AU DABI» survegnan persunas cun la «ChurCard» 25% pli bunmartgà. Lura custa ella per indigens creschids 479 francs, per uffants fin 16 onns 239 francs. Ina pussibladad supplementara è er l'abunament da famiglia. Plinavant datti plirs rabats, per exempel per emprendistas ed emprendists.