Per blers clients da la Spitex n'èsi betg pussaivel dad ir giuadora e visitar occurrenzas culturalas. Perquai ha la Spitex Grischun dà la pussaivladad a tut ses bun 6000 clientas e clients da sa participar ad ina concurrenza, nua ch'igl ha dà da gudagnar 100 concerts privats. Cunquai che gist var 100 persunas èn stadas da la partida, survegn ussa mintgina e mintgin d'els in concert en sia atgna stiva.
Per quai van mintgamai 2 musicists da la Kammerphilharmonie dal Grischun a chasa tar las clientas ed ils clients e sunan in concert da bun 20 minutas cun tocs classics. Quai duai far plaschair als clients da la Spitex che dovran tgira, perquai che quels n'han savens betg ina vita simpla.
La musica fa bain a l'olma.
Avant duas emnas han gia gì lieu ils emprims concerts privats, ed i saja stà in eveniment spezial tant per las audituras sco era per ils musicists. Ussa èn ils organisaturs surtut vi da planisar ils concerts pendents per purtar uschia la musica classica da la tribuna tar la glieud a chasa.